𝗨𝗻𝗶𝘃𝗲𝗿𝘀𝗶𝗱𝗮𝗱𝗲 𝗠𝗲𝘀𝘀𝗶𝗻𝗮 𝗜𝘁𝗮𝗹𝗶𝗮 𝗥𝗲𝗸𝗼𝗻h𝗲𝘀𝗲 𝗣𝗥 𝗛𝗼𝗿𝘁𝗮 𝗛𝗼 𝗧𝗶𝘁𝘂𝗹𝘂 𝗗𝗼𝘂𝘁𝗼𝗿 𝗛𝗼𝗻𝗼𝗿𝗶𝘀 𝗖𝗮𝘂𝘀𝗮

Imajem : Presidente Repúblika José Ramos Horta simu hosi Universidade Messina Italia, 19/11/2025. Foto : Média PR

SAP News TL, Díli : Universidade Messina Italia, atribui títulu Doutór Honoris Causa iha área Siénsia Polítika ba Xefi Estadu no Laureadu Nobel da Paz José Ramos-Horta, nu’udar rekuiñesementu ba kontribuisaun esesionál Prezidente nian ba rezolusaun konfliktu, diplomasia, no konstrusaun nasaun.

Tuir informasaun ne’ebe sita husi Média PR, Quarta-Feira 19 novembru de 2025, hafoin simu titulu Honoris iha diskursu Prezidente Ramos-Horta espresa gratidaun boot no aprezenta jornada Timor-Leste nian husi luta to’o soberania nu’udar sasin ba kbiit perdaun no rekonsiliasaun nian.

Prezidente fo sai susesu notavel Timor-Leste nian hafoin independénsia no subliña estatutu nasaun nian nu’udar demokrasia vibrante ho ekonomia ida-ne’ebé robusta no buras daudaun, dívida públika mínimu, no jestaun finanseira prudente.

Xefe Estadu pozisiona rekonsiliasaun istórika ho Indonézia ne’ebé transforma pasadu ida-ne’ebé moruk ba relasaun bilaterál ida-ne’ebé besik liu iha mundu nu’udar modelu globál ida-ne’ebé forte.

Narrativa ida-ne’e hatudu ho klaru transformasaun Timor-Leste nian ba nasaun estável no dezenvolvimentu ne’ebé harii ho fundasaun korajen, vizaun estratéjika, no kompromisu metin ba pás.

PR Ramos-Horta mós fó sai apelu maka’as ba reforma urjente Nasoins Unidas nian, partikularmente Konsellu Seguransa, atu halo nia sai ekitativu no efetivu liu.

Prezidente Repúblika mós ko’alia ho laran-susar boot kona-ba konfliktu globál sira hodi deskreve situasaun iha Gaza nu’udar “rai-kuak morál no polítiku” ida-ne’ebé dezafia ita-nia umanidade komún.

Diskursu Prezidente nian pozisiona metin Timor-Leste nu’udar lian konsiénsia nian iha palku mundiál hodi oferese ninia istória rasik nu’udar mensajen esperansa katak diálogu no kooperasaun bele manán divizaun sira-ne’ebé kle’an liu.