𝗩𝗶𝗻𝗰𝗲𝗻𝗰𝗶𝗼 𝗛𝘂𝘀𝘂 “𝗙𝗼𝗶𝗻𝘀𝗮’𝗲 𝗣𝗿𝗲𝗽𝗮𝗿𝗮 𝗔𝗻, 𝗘𝘀𝘁𝘂𝗱𝗮 𝗗𝗶𝗱𝗶𝗮𝗸 & 𝗦𝗲𝗿𝘃𝗶 𝗡𝗮𝘀𝗮𝘂𝗻”.
Imajem : Estudantes Dada Bandeira Nasional iha Oesilo, 12/11/2025.
SAP News, RAEOA : Relativamente ho komemorasaun loron Masakre Santa Kruz ba dala-34 no Loron Nasional Juventude ba dala-20, DRESS-RAEOA Vincêncio Cono husu foinsa’e sira valoriza herói sira, kria paz, estuda didiak, prepara an hodi servi povu no nasaun iha futuru.
Diretór Regionál Edukasaun no Solidariedade Sosiál (DRESS) Rejiaun Administrativa Espesiál Oé-cusse Ambeno (RAEOA), Vincêncio Cono hamutuk ho Dirijente Ensinu Báziku Central 3⁰ siklu Oe-silo, Ensinu Sekundária Jerál Filiál Tranzitóriu Leobeno Oe-silo inklui Ensinu Báziku Filiál Oe-silo realiza Içar Bandeira Nasionál ba komemorasaun Aniversário loron Nasionál Juventude ba dala XX no 12 Novembru Masakre Santa Cruz ba Dala XXXIV.
Vincêncio Cono hatete loron Nasionál Juventude 12 Novembru Masakre Santa Cruz tinan 1991 loke mundu nia matan no determina independénsia Timor-Leste nian.
“Ita-nia eroís da pátria sira, momentu ne’eba sira la husu buat barak, maibé sira iha prinsipiu ida katak Timor-Leste tenke ukun aan,” Dehan Diretór Regionál Edukasaun no Solidariedade Sosiál Vincêncio Cono iha Oesilo, 12/11/2025
Juventude loriku as wa’in fó aan ba mate hodi defende Timor-Leste nia Independénsia, ohin komemora loron importante ne’e hodi relembra no fo onra ba eroi no iroina sira ne’ebe mak lakon sira-nia vida iha tempu ne’eba.
“Komemorasaun aniversário Masakre Santa Cruz 12 novembru ne’e atu hafun ita hodi refleta fila fali asuwain sira ne’ebe iha mundu seluk no sira ne’ebe sei moris hamutuk ho ita hodi fó onra no valoriza sira nia envolvimentu iha luta libertasaun Nasionál.” Nia Dehan.
Imajem : Diretór Regionál Edukasaun no Solidariedade Sosiál Vincêncio Cono
Vincêncio husu foinsa’e sira valoriza herói sira, kria paz no estabilidade, estuda didiak, prepara an hodi servi povu no nasaun iha futuru.
“Nu’udar joven jerasaun foun, tenke prepara aan no hado’ok aan husi violénsia oioin, estudante sira tenke aproveita eskola no hakas aan estuda hodi servi ba nasaun, banati tuir Juventude loriku as wa’in sira ne’ebe kontribui ona ba luta libertasaun Nasionál no kria unidade”.
“Labele halo buat ne’ebe la fó benefisiu ba imi, maibé halo buat ne’ebe mak iha benefisiu ba imi hodi dezenvolve nasaun ne’e ba oin.” Nia husu
Iha serimónia Içar Bandeira Nasionál ne’e hetan partisipasaun máximu husi Diretór Regionál Edukasaun no Solidariedade Sosiál, Xefe Departamentu Planeamentu, Dirijente Eskola sira inklui manorin sira, inklui estudante sira.