12 Novembru ! Lere Husu Joven Sira Halo Reflesaun
Imajem : Tenente Jeneral Reformadu Lere Anan Timur iha Santa Kruz, Tersa-feira(12/11/2024).
SAPNewsTL, Díli – Tenente Reformadu Lere Anan Timur konsidera Masakre Santa Kruz iha tinan 1991 nu’udar violasaun ba direitus umanus ne’ebe loke mundu nia matan hodi haree situasaun sofrimentu no injustisa iha Timor-Leste.
Tenente Reformado Lere Anan Timur hateten, ohin halo tinan 33 momentu istoriku bo’ot ida, ne’ebe akontese iha santa kruz hodi bolu Masakre Santa Kruz, momentu ne’ebe mosu violasaun direitu umanu hodi fanun mundu ninia atensaun sériu mai Timor-Leste
“Akontesimentu Masakre Santa kruz hanesan violasaun direitu umanu, hodi fanun no loke mundu nia matan atu haree situasaun ne’ebe mak povu Timor-Leste hasoru, loron 12 de Novembru hanesan loron nasional ne’ebe mak hafanu ita sira ne’ebe mak sei moris hodi halo reflesaun. “Dehan Tenente Reformado Lere Anan Timur bá jornalista sira iha Santa Kruz, Tersa-feira(12/11/2024).
Lider istóriku ne’e salienta joven sira tenki halo reflesaun ba momentu istoriku Masakre Santa Kruz, hodi rekonsilia, respeita no hadomi malu, nune’e bele kontribui ba desenvolvimentu Timor-Leste nian.
“Ha’u bele dehan katak ita ne’ebe mak sei moris ita lori tusan bo’ot husi sira ne’ebe mate ona, tanba sira mate hakarak ukun rasik an no moris iha desenvolvimentu nia laran tanba ne’e mak husu ba foinsa’e sira atu hatutan istoria ne’e ba jerasaun tuir. ” Nia informa
Eis Jeneral ne’e dehan tempu ba lider nasional sira atu hamutuk hodi halo estatejia no lori dezenvolvimentu ba povu tanba partidu la hanesan ne’e nu’udar kestaun individual.
“Ita hamutuk para bele alkansa ita nia objetivu no estatejia ba dezenvolvimentu nasaun nian, uluk ita hamutuk hodi luta ba ukun rasik an, ohin mos ita hamutuk hodi lori dezenvolvimentu, ita hein saida mak am an sira fo ba rai ne’e molok husik”. Lere Anan Timur hateten
Enkuantu, iha ambitu selebrasaun Maskre Santa Kruz ba dala-33 partisipa maksimu husi Presidente Repúblika José Ramos Horta, Vise Primeiru Ministru, Ministru Coordenador Habitasaun Urbana Mariano Asanami Sabino, Tenente Reformado Lere Anan Timur, Eis Presidente Repúblika Francisco Guterres Lu-olo, Sekretáriu Jerál Partidu FRETILIN Marí Bin Amude Alkatiri, sobrevivente sira, juventude sira no povu Timor-Leste.
Jornalista : Eleonora Fatima Dos Santos