Husi Vietname Ba Timor-Leste: PM Xanana Hakarak Adapta Modelu Zona Industriál

Imajem: Primeiru-Ministru Kay Rala Xanana Gusmão iha reuniaun ho responsável sira hosi VSIP, Segunda-Feira, 08/06/2026. Foto: Media PM

‎SAPNewsTL, Vietname: Primeiru-Ministru (PM), Kay Rala Xanana Gusmão deklara Timor-Leste hakarak aprende barak hosi nasaun membru sira Association of Southeast Asian Nations (ASEAN), liu-liu nasaun Vietname iha ninia dezenvolvimentu ekonomia nasionál. Wainhira vizita Parke Industriál Vietname-Singapura (VSIP) ne’ebé lokaliza iha Sidade Thuan An, Provínsia Binh Duong.

‎
‎“Nu’udár membru foun ASEAN nian ami aseita hala’o vizita iha Vietname atu aprende hosi imi. Ha’u mai da-huluk Vietname iha tinan 2000 no agora ha’u mai fali haree mudansa bo’ot tebes kompara ho situasaun iha tempu ne’ebá”.

“Ho vizita ida-ne’e, ami hakarak estabelese kooperasaun entre país ASEAN sira. Ami presiza aprende hosi imi, liu-liu iha área ekonomia, agrikultura no agroindústria”. PM Xanana hateten iha reuniaun ho responsável sira hosi VSIP, Segunda-Feira, 08/06/2026.
‎
‎Primeiru-Ministru mós manifesta interese atu estabelese kooperasaun ho VSIP, inklui oportunidade bá foin-sa’e Timoroan sira atu hetan formasaun no esperiénsia iha seitór industriál. Asuntu ne’e sei sai parte hosi diskusaun iha fórun ASEAN sira iha futuru.
‎
‎Iha enkontru ne’e, Vise-Prezidente Provínsia Bac Ninh, Le Xuan Loi, destaka relasaun amizade ne’ebé kleur ona entre Vietname ho Timor-Leste ne’ebé lembra katak Vietname nu’udár nasaun ida ne’ebé rekoñese Frente Revolusionária bá Timor-Leste Independente (FRETILIN) iha Setembru 1975, no nasaun rua ne’e estabelese relasaun diplomátika ofisiál iha 28 Jullu 2002.
‎
‎Le Xuan Loi hateten, relasaun entre Vietname ho Timor-Leste kontinua dezenvolve relasaun di’ak durante tinan hirak liu-bá, liu-hosi kontaktu polítiku no diplomátiku iha nível aas, inklui iha eventu no enkontru ASEAN sira.
‎
‎Ho vizita Primeiru-Ministru Xanana Gusmão bá Bac Ninh nia espera katak, sei sai marka importante ida hodi haburas kooperasaun entre provínsia ne’e ho parseiru sira iha Timor-Leste, liu-liu iha área indústria, investimentu no empregu.
‎
‎“Ha’u espera katak delegasaun Timor-Leste bele hetan informasaun barak kona-bá dezenvolvimentu zona industriál sira iha Bac Ninh no estuda possibilidade atu adapta modelu hanesan ne’e iha Timor-Leste. Fulan ida liubá, ami mós diskute ho Ministru Empregu Timor-Leste no Embaixadór Timor-Leste iha Vietname kona-bá oportunidade atu lori traballadór Timoroan sira mai servisu iha parke industriál sira iha provínsia ne’e”. Informa Vise-Prezidente Provínsia Bac Ninh, Le Xuan Loi
‎
‎Le Xuan Loi konsidera lideransa PM Xanana bele lori relasaun bilaterál entre nasaun rua ne’e bá nivel aas liu-tán no kontribui bá páz, estabilidade no dezenvolvimentu iha rejiaun Sudeste Aziátiku.
‎
‎Parke Industriál Vietname-Singapura (VSIP) konsideradu hanesan símbolu relasaun metin no kooperasaun ekonómika entre Vietname ho Singapura. Empreza ne’e harii liu-hosi parseria entre Becamex IDC Corporation hosi Vietname no Sembcorp Development hosi Singapura ho apoiu hosi governu nasaun rua nian.
‎
‎Akompaña Primeiru-Ministru iha vizita ofisiál ne’e Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay; Vise-Primeiru-Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino; Ministru Negósiu Estranjeiru no Kooperasaun, Bendito dos Santos Freitas.

Ministra Edukasaun, Dulce de Jesus Soares; Ministru Komérsiu no Indústria, Filipus Nino Pereira; Vise-Ministra Asuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; no Xefe Gabinete Primeiru-Ministru, Elizabeth Exposto.
‎