Dalan Ba Kopa Mundial 2026 ! Bandeira Argentina & Portugal Folin Iha Merkadu
Imajem: fa’an na’in António da Silva. Bandeira Argentina, Portugal, França, Brazil & Jerman, Dili, segunda-feira 08/06/2026. Foto: SAP News TL
SAPNewsTL, Dili : Kopa Mundiál 2026 ne’ebé sei hahú iha loron 12 Junhu, fa’an na’in António da Silva hateten bandeira Argentina folin liu, tuir kedas bandeira Portugal, França, Brazil, Jerman adeptus hosi nasaun 48 iha Timor-Leste kontinua faan bandeira hodi festeza kompetisaun ba trofeu mundial.
Adeptu António da Silva Barros, hateten Kopa Mundiál 2026 besik daudaun, nune’e komunidade sira hahú halo diskusaun no fo espetativa oioin kona-ba nasaun ida ne’ebe bele manan kopa mundial 2026.
“Ami hein kleur tebes ona ba Kopa Mundiál, la kleur nasaun kuakifikadu hamutuk 48 sei kompete, jogu sei sai kompetitivu no rame liután. Ema hotu iha mundu sei akompanha no festeza”. Dehan António da Silva ba SAPNewsTL iha Jardim 5 de Maio, Dili, segunda-feira (08/06/2026).
António hatutan, nia kontinua fó apoiu ba ekipa selesaun nasionál Argentina tanba garante espiritu luta, performansia no perseveransa ne’ebé sira hatudu durante tinan barak.
“Ha’u apoiu Argentina tanba ekipa ne’e la fasil desiste, sira kontinua luta nafatin no ikus mai konsege manán Kopa Mundiál. Lionel Messi ho nia kolega sira hatudu katak futeból la’ós depende ba ema ida, maibé kona-ba servisu hamutuk, ajuda malu no luta to’o final.” Nia sublinha
António dehan Lionel Messi nu’udar jogador favoritu tanba talentuozu, disiplina no servisu maka’as iha karreira futeból.
“Messi inspira ha’u tanba nia susesu la’ós sorte. Nia treina maka’as no la desiste. Ida ne’e mak hanorin ami katak atu atinje objetivu ruma tenke iha perseveransa no determinasaun.” Nia Konta
Nia akresenta mehi boot ida ba futeból nasional mak haree bandeira Timor-Leste iha loron ida bele marka prezensa iha kompetisaun mundial ne’e.
“Ha’u nia mensajen ba juventude timoroan sira mak servisu hamutuk, respeita malu no la desiste. Se nasaun seluk bele hein tinan barak atu atinje susesu, ita mos bele kontinua luta atu realiza ita-nia mehi. Ha’u espera loron ida bandeira Timor-Leste bele mosu iha Kopa Mundiál.” Nia dezeja.
Fa’an na’in ne’e informa komprador bandeira komesa aumenta durante semana hirak ikus ne’e liliu bandeira Argentina folin liu bandeira Portugal.
“Iha loron ha’at ne’ebé ha’u komesa fa’an bandeira, bandeira Argentina mak folin liu. depois Portugal, Fransa, Brazil no Jerman mos iha adeptus barak ne’ebé sosa. Maske atividade ida ne’e la kleur, osan ne’ebé ami hetan ajuda tebes ami atu sustenta família no nesesidade lorloron nian.” António salienta
Iha sorin seluk, Adão Moreira husu ba adeptus futeból sira atu selebra Kopa Mundiál ho espíritu desportivu no respeitu ba malu.
“Maski ita apoia ekipa diferente, importante liu mak hametin domin, paz no estabilidade. Kopa Mundiál tenke sai momentu ida atu haksolok hamutuk, la’ós hodi kria konflitu entre ita ho ita liu hosi tolok no insulta malu”Nia husu
Entusiasmu ba Kopa Mundiál 2026 la sente de’it entre adeptus futeból sira, maibé mos lori oportunidade ekonomika ba vendedór ki’ik sira ne’ebé hahú fa’an bandeira iha dalan ninin.
Entretantu, Kopa Mundiál FIFA 2026 ne’e sei realiza iha Estados Unidos da América, Kanada no Méxiku, eventu ne’e atrai atensaun husi adeptus barak iha mundu inklui Timor-Leste ne’ebé komesa ona sente atmosfera kampionatu mundial ne’e liu husi diskusaun, preparasaun no atividade komersiál sira.
