Fo Krisma Ba Sarani 467 ! Dom Leandro Husu Defende Jesus Ho Hahalok Diak

SAPNewsTL, Lautem: Bispu Dioseze Baucau Dom Leandro Maria Alves fo sakramentu krisma ba krismadu sira hamutuk atus haat neen nulu resin hitu (467) iha Parokia São Paulo Lospalos.

Tuir Amo Bispo Dioseze Baucau Dom Leandro Maria Alves iha nia homilia hateten hirak ne’ebe simu ona sakramentu krisma sai ona maduru nu’udar fiar sarani hodi sai soldadu Kristu nian.

“Imi sai ona maduru ka sai ona ema ne’ebe adultu imi mos sai soldadu ita Na’i Jesus Kristu ninian, ne’e katak imi mak sei defende fiar sarani ninian iha imi nia moris loron-loron”. Dehan Bispo Dioseze Baucau Dom Leandro Maria Alves liu husi nia homilia iha igreja São Paulo Lospalos, Kuarta-Feira,31/01/2024

Bispo Dioseze Baucau ne’e hatutan la’os dehan defende Na’i Jesus Kristu ne’e liu husi baku malu maibe liu husi hahalok di’ak ne’ebe hanesan Jesus hatudu.

“Defende ka defensor ne’e la’os liu husi ita ninia fiziku ninian ka atu baku malu ninian, defende Na’i Jesus Kristu ne’e liu husi hahalok di’ak sira hanesan Na’i Jesus hatudu buka atu ko’alia, buka atu oinsa maluk di’ak ho maluk sira buka hatudu hanesan sarani di’ak ne’e liu husi hahalok di’ak sira ne’e, ida ne’e mak dehan maduru ka hatene defende imi nia fiar ne’e”. Bispo Dom Leandro informa.

Bispo Leandro akresenta “Espiritu Santu ne’ebe mak ohin imi husu liu husi selebrasaun ne’e Espiritu Santu nia dons hitu ne’e atu tun ba imi atu imi sai hanesan defensor ne’ebe mak di’ak ita Na’i Jesus Kristu”. Bispo salienta

“Iha ne’ebe deit hatene imi nia an katak imi ema sarani ema ne’ebe fiar iha Na’i Jesus Kristu, imi ema ne’ebe sarani katoliku ninian, ita hatene katak maromak hadomi teb-tebes ita, nia haruka Jesus mai moris iha ita nia leet hodi lori fila fali ita hotu ba maromak”. Tenik Dom Leandro

Bispo ne’e mos husu ba krismandu sira atu hatudu sira nia fiar liu husi hahalok kiik sira hodi hatudu katak sira ema sarani katoliku ne’ebe defende nia fiar iha Kristu.

“Ba krismandus sira buka atu iha imi nia moris hatudu imi nia fiar ne’e lalos dehan tenke liu husi hahalok ne’ebe boot maibe hatudu imi nia fiar ne’e liu husi hahalok kiik sira hatudu imi nia fiar ne’e hodi dehan katak imi ema sarani katoliku ida ne’e mak dehan defende imi nia fiar ne’e”. Dom Leandro hameno

Entretantu, sarani sira ne’ebe simu sakramentu krisma ne’e hamutuk atus haat neen nulu resin hitu, iha selebrasaun ne’e hetan partisipasaun maksimu husi sarani sira

Jornalista: Luis Pailofo