Semana Santa ! Tempu Rekunhese Sala & Tahan Terus

SAPNewsTL, Dili : Hafoin selebra loron Domingu Ramos iha Parokia Sagradu Korasaun de Jesus (SAKROJES), Pe. Bernardo Paiva haktuir tempu semana santu ne’e momentu opotunu ba sarani sira hodi halo reflesaun no hanoin ba Jesus nia terus, mate no moris hias.

Padre Bernardo husu ema hotu hodi hanoin ba Jesus nia mate no moris hias, ema ida-idak presiza hanoin ba sira nia sala, oinsa hader hikas fila ba Maromak.

“Iha semana santa ne’e fo hatene mai ita atu hanoin didiak ita nia salan sira hotu, hanoin ba Jesus nia terus no mate ida ne’e, katak durante ne’e ita halo sala mak barak ka diak mak barak, ita tenki buka rekunhese ita nia an”. Tenik Pe. Bermardo Paiva ba SAPNews iha Igreja SAKROJES Bekora, 24/03/2024

Padre Selebrante ne’e mos husu ba foinsa’e sira hodi hatene kuidadu an, respeita an no kria damen iha sosiedade nia let tanba joven mak forsa produtiva ne’ebe iha potensia boot ba desenvolvimentu nasaun nian.

“Joven tenki kuida an no respeita an, aproveita idade produtiva ne’e halo buat diak ruma hanesan halo pinta, kuda ai oan, pratika desportu hodi kria paz, foinsa’e sira presiza komuniaun ho Jesus nia futar liafuan sira hodi bele moris tuir”.

“Timor maioria ema joven, joven ne’e forsa ba estadu no igreja, joven sira ne’ebe involve iha Arte Marsial no Ritual ne’e diak liu tan, maibe tenki iha regra ne’ebe rigorozu hodi fo kontrolu makaas ba membru sira katak sira ne’ebe halo problema tenki hetan sansaun”. Bernardo Paiva sublinha.

Administrador Parokia SAKROJES ne’e konsidera terus ne’e diak tanba husi terus ne’e bele purifika fiar sarani nian sai forte no dekobre liu tan sira nia an

“Terus ne’e diak laos la diak, terus ne’e halo ita purifika ita nia an, dekobre diak liu tan ita nia an, hafoun ita nia an, terus ne’e bele halo ita sai forte no metin liu tan iha fiar no hahalok, tanba ne’e sarani diak tenki hatene halo sakrifisiu molok to’o ba ita nia objetivu, liliu sarani sira mai misa tenki hotu mak fila, labele fila uluk maske misa seidauk remata ne’e ita tuir misa la kompletu”. nia dehan

Bernardo Paiva husu sarani hotu-hotu atu hakaas an rekunhese ninia salan no fila ba maromak nia dalan hodi moris tuir sagrada eskritura tanba momentu semana santa ne’ebe Maromak fo biban ba sarani sira hodi simu perdaun no bensaun husi Maromak.

Jornalista : Ekipa Kobertura