Ai-Leba Ko’alia, Uluk Ami Terus no Ohin Sei Nafatin, Lito : Ezije Guvernu Loke Kampu Servisu

SAPNewsTL, DILI : Relasiona ho Deputadu husi Bankada FRETILIN ne’ebe lamenta ho presensa Povu Ai-Leba oan sira ne’ebe ba faan sira nia produto iha Palasiu Prezidensial, Porta Voz Ai-Leba Lito da Costa Andrade sente trizte, lamenta no ezije Guvernu Kria oportunidade de Empregu ba Ai-leba oan sira

“Ami agradese nafatin ba média sira tanba konsidera ami,maski ami foer, ami kiik, ami hato’o deit lamentasaun sira husi deputadu bankada FRETILIN ne’ebe lamenta ho ami negosiante ambulante hanesan ai-leba oan, la bele ba faan sasan iha fatin Palasiu Prezidénsial tanba ami halo foer iha fatin refere no hatun dignidade nasaun ne’e nian.” tenik Porta Voz Lito da Costa Andrade iha Jardim 5 de Maiu, Dili, 01/07/2022

Porta Voz ne’e akresenta ai-leba iha tanba  ejiste nafatin husi beiala sira to’o ami nia jerasaun tanba deit ita nia governu la iha kapasidade hodi loke kampu trabalho mai timor oan ho ida nee mak to’o agora ai leba kontinua iha ba beibeik

“Ami konsidera katak kbiit seidauk naton no seidauk kobre ba ami, ami halo ida ne’e ami ajuda estadu hadia  ami nia moris tanba estadu la iha responsabilidade,atu hadia ami nia moris, ami halo foer la’os ohin mak halo ida ne’e 2014-2015, ami vendedor ambulante ba ona hasoru Parlamentu Deputadu lubuk ida koñese ami iha ne’eba nu’udar vendedor ambulante”. Nia fundamenta

Nia hatutan seidauk taka dalan, se hakarak mobiliza sira hakarak mobiliza vida ambulante sai fali vida seluk ida liu husi kampu de traballu

“Nune’e ba oin ami bele husik ona aileba, bele loke kampu traballu ruma, ami husik aileba ami bele ba serbisu iha ne’eba, se ita nia maluk balu sai ba rai liur ita boot sira deporta fila, agora ami iha ne’e la hetan serbisu,ami lori aileba ida ne’e,ami nunka halo problema,ami lori ai leba ne’e hodi hadia ami nia moris”. Nia hatete

Nia akresenta sira nunka tane liman  ismola ba Parlamento ka Governu ne’e, husi sira nia aileba duni maka transforma sira nia moris, sustenta ami nia familia, no suporta oan sira nia eskola

“Se karik Deputadu hanoin katak ami halo foer,se hanesan ne’e deputadu mai husi foer gala’e uluk ne’e ami lubuk ida vota ba ukun an, ohin loron ami terus nafatin, uluk mos terus agora mos terus nafatin”. Nia sublinha

Nia fundamenta tan, Palásio Prezidente laos deit ba deputadu sira maibe ba ita hotu nu’udar Timor oan ne’ebe moris iha rai ne’e

“Ami kbiit laek, uluk levanta to’o ne’eba sira mak hari’i guarda munisipal hadau ami nia aifuan hadau ami nia osan hotu, to’o ema ida la responsabilidade ami to’o parlamentu, Autoridade Munisipal  ami halo mediasaun iha parlamentu,sira iha responsabilidade uitoan katak selu ami nia osan ne’ebe mak lakon,ho total  $ 1.360 iha ne’eba mos to’o agora la selu, nunka”. Tenik nia

Enkuantu, Porta Voz Lito da Costa Andrade husu guvernu nia responsabilidade no kapasidade hodi kria kampu de traballu, nia deklara pronto husik ai-leba wainhira guvernu kria kondisaun dignu ba ai-leba sira

Jornalista: Sergio De João Batista Lelan & Lidia Amaral