Assanami Preokupa Sidadaun TL Rua Estadu Inglaterra Foti Tiha Tinan 6 Familia La Haree
SAPNewsTL, Dili, 04/07/2022 : Deputadu Bankada Partidu Demokrátiku Mariano Assanami Sabino, levanta kestaun ne’e iha Plenária Parlamentu Nasionál Ohin, Nia hateten sidadaun Timor oan nain rua ne’ebe Estadu foti tiha kuaze tinan neen (6) ona familia la haree nia oan, tanbe ne’e deputadu ne’e husu atu Estadu Timor-Leste tau atensaun
“Ita-nia sidadaun Timoroan na’in rua iha Inglaterra ne’ebé mak ninia oan na’in rua ne’e karik iha problema, agora estadu foti tiha ninia oan na’in rua kuaze tinan 6 ona sira la haree sira nia oan ne’e iha ne’ebe, tanba sira iha ne’eba tuir lei, sira labele haree maibé estadu Timor-Leste tenke haree tanba ne’e sidadaun timoroan, ninia kondisaun halo nu’usa, sira iha ne’ebé ita presiza tau matan kona-bá ida ne’e”. dehan Deputadu Assanami iha nia Intervensaun, Dili, 04/07
iha fatin hanesan, Deputadu Bankada PD ne’e mos husu Ministériu Negosiu Estrangeiru no Kooperasaun (MNEK) no Sekretaria Estadu Formasaun Profisional no Empregu (SEFOPE) tau matan ba joven sira ne’ebé servisu iha rai li’ur, dignifika sira no kontrola hodi haree katak sira iha ne’ebé ona.
Iha parte seluk, Deputadu Mariano Assanami Sabino mos preokupa ho populasaun sira iha Merkadu Comoru uluk ne’ebe dala barak duni deit, nune’e nia husu labele duni deit, dudu deit, haruka deit, tenki trata povu ho dignu
“Povu iha merkadu Comoro uluk ita muda tiha maibé fa’an sasan ne’e presiza duni atu ba iha ne’eba, entaun ita tenke haree estatus merkadu Comoro ne’e estadu nian ka privadu nian ita presiza haree didi’ak, dala ruma ita haruka hotu-hotu ba Manleu, maibe iha ne’eba fa’an ema la sosa i ema fa’an nafatin iha luron sira ne’e entaun sira mos buka para oinsá sira nia sasán ne’e ema sosa hotu sira fila fali ba fatin ne’eba, ne’ebé importante mak Ha’u-nia levanta iha ne’e atu trata dignu ita-nia povu ne’e, nia bele fa’an sasán iha ne’ebé deit maibé tenke trata dignu katak fasilita lalais la’os ba dudu deit, haruka sai deit, duni deit ne’e labele akontese”. Dehan Assanami Atual Presidente PD
Entretantu, Deputadu ne’e mos husu ba Ministériu relevante atu tau matan nafatin relasiona ho inundasaun ne’ebe akontese iha fatin-fatin, liu-liu iha Quelicai, eskola balu ameasadu, iha Suai Loro inklui fatin sira seluk.
Jornalista : Eduardo Moniz
Editor : SAPNewsTL