SEF Kolleta Hare Hektares 43 ! MAP Sei Produz Hare To’o 60%
Imajen : SEF Fernandino Vieira da Costa hamutuk Autoriedade Munisipiu Lautém iha Luro, 13/06/2024
SAPNewsTL, Lautem – Sekretariu Estadu Floresta (SEF) Fernandino Vieira da Costa kolleta hare hamutuk hektares hatnulu resin tolu (43) iha Postu Luro Munisipiu Lautem.
Iha entrevista ho Sekretariu Estadu Floresta Fernandino Vieira da Costa haktuir hare ne’ebe mak kuda ne’e ho variedade nakroma, hare ne’ebe kolleta hamutuk hektare haat nulu resin tolu.
“Ohin mai partisipa kolleta hare iha ne’e, variedade hare ne’ebe mak ita kolleta ne’e variedade nakroma mak hala’o iha ne’e hamutuk hektares haat nulu resin tolu (43) ne’e”. Katak Sekretariu Estadu Floresta Fernandino Vieira da Costa liu husi nia intrevista ba jornalista sira iha Tauimir-Cotamuto, 13/06/2024
Sekretariu Estadu ne’e hatutan, politika IX guvernu ne’e oinsa bele nafatin hasa’e produsaun hare hodi nune’e labele dependensia ba hahan ne’ebe mai husi rai liur tanba ne’e nafatin hamutuk ho povu agrikultura promove no dezenvolve area kultivu sira.
“Agora daudaun ita iha 37.000 hektare area kultivu ne’ebe mak iha i durante periodu tinan lima mai sei kompleta tan ho 50.000 hektares area kultivu ne’ebe mak iha”. Tenik SEF
Imajen : Entrevista Sekretariu Estadu Floresta Fernandino Vieira da Costa
SEF mos iha esperansa katak molok tinan lima mai produsaun hare bele atinje pursentu neen nulu husi hektare rihun lima ne’ebe planu ona.
“Espera katak apoiu husi parte povu agrikultura ida ne’e importante tebes-tebes, nune’e ita bele atinje metas ne’ebe ita iha, ita planu ona durante tinan lima mai tanba ne’e molok to’o tinan lima tenke atinje ona pursentu neenulu husi total area 50.000 hektare ne’ebe mak ita planu tiha ona”. Nia espera
Iha fatin hanesan, Prezidente Autoriedade Munisípiu Lautem Mélio de Jesus mos kongratula povu agrikultor sira iha Postu Luro ne’ebe servisu badinas hodi hasa’e produsaun agrikola.
“Nu’udár Autoridade hakarak kongratula no hato’o apresiasaun bo’ot ba agrikultor sira iha Suku Cotamuto Postu Luro ne’ebe hala’o kolleta hare iha Suku ida ne’e, ita halo atu motiva ita nia agrikultor sira ne’ebe ke servisu badinas hodi hasa’e produsaun agrikola liu-liu hare iha Postu Administrativu Luro ida ne’e”. PAM Parabeniza
PAM Lautem ne’e afirma povu agrikultura sira servisu ho vontade rasik ne’ebe bele halo kultivasaun nune’e bele hahu kolleta.
“Relatoriu ne’ebe servisu Munisipal Agrikultura Lautem hato’o katak por volta de atustolu tolunulu resin tolu (333) ital hektare mak ohin ita halo primeira kolleta husi 333 ne’e mak ita bele hetan produsaun atus ualu sanulu resi hitu (817) toneladas ba fos signifika katak ita nia agrikultor sira ne’e servisu badinas hetan apoiu husi ekstensionista sira, sira mai ho vontade rasik sira mai ho kondisaun ida ne’ebe ladún fo asistensia diak maibe tanba espiritu ida nu’udar agrikultor sira bele servisu diak ohin loron ita bele mai halo kolleta ida ne’e”. Nia informa
Entretantu, iha aktividade kolleta hare ne’e hala’o iha Tauimir Aldeia Ouroma Suku Cotamuto Postu Administrativu Luro Munisípiu Lautem ne’ebe partisipa husi Sekretariu Estadu Floresta, Sekretariu Estadu Dezenvolvimentu Lokal, Prezidente Autoridade Munisipiu Lautem, Xefe Gabinete husi MAPPF, Servisu Agrikultura Munisípiu Lautem, Servisu Seguransa Alimentar Munisípiu Lautem, Administrador Postu Administrativu Luro, Guarda Floresta, Ekstensionista Postu Luro, Komandante PNTL Eskuadra Luro, Veteranus, Autoridade Suku hamutuk ho komunidade Luro
Jornalista: Sandra Soares & Evarinda Pinto
