Forma Joven Sai Di’ak & Ksolok ! ASK Sei Lori Foinsa’e Hakbesik Ba Maromak

Imajem : Membru ASK tuir promesa iha Igreza Katedral Santu António Baukau, 10/08/2024. Foto : Dircia Belo

SAPNewsTL, Baucau – Aspirante Salezianu Kooperadór (ASK)  nia mebru hamutuk 13 simu promesa no deklaradu sai membru permanente ASK iha Kreda Katólika Timor-Leste, ASK promete sei servisu hamutuk ho padre salazianu sira hodi forma no hakbesik joven sira ba Maromak hodi halo sira moris ho haksolok no damen.

Vokasaun Espesial ne’e hilí no bolu liu hosi Asosiasaun Salezianu Kooperadór Sira, iha ne’ebe halo sai servidor no soldadu Kristu Jesus nian hodi servi Maromak nia povu.

Misa Eukaristia Santa ne’e Prizide husi Padre Provinsiál Salezianu SDB no koselebrante sira iha Igreja Katedral Baukau.

Padre selebrante Adérito Manuel Euclides Victor da Costa,SDB fo agradese no parabeniz sarani na’in  13 ne’ebe simu promesa hodi sai membru permanente ba ASK.

Pe. Adérito dejezu bele sai buras iha dioseze Baukau hodi servi no tau matan ba foinsa’e sai sidadaun ne’ebe honestu no ksolok tuir Maromak nia dalan.

“Espera familia saleziana Baucau sai boot no buras daudauk iha Baukau, tau matan bá foinsa’e sira, nune’e Dom Bosco nia hakarak lori foinsa’e sira ba kristu, familia saleziana  tenki hala’o kna’ar tuir Dom Bosco nia mehi hakarak lori foinsa’e sira bá ksolok.”

Pe. Adérito hatutan, “Foinsa’e sira tenki hala’o sira nia kna’ar ne’e didiak, hamutuk ho kooperador salezianu, ami nia misaun ida mak tau matan bá oratóriu no planu pastoral hodi bele ajuda foin sa’e sira liu husi formasaun fiar, formasaun humana no halo sira partisipa iha atividade kreda nian”.

“Knaar ne’ebe ami hala’o importante mak foinsa’e sira haksolok no hatene sira nia moris maske iha simplesidade no susar nia laran, sira nafatin haksolok tanba Dom Bosco nia objetivu mak ne’e, lori salvasaun ba foinsa’e sira”.

Bibi atan ne’e akresenta, “buka hatene iha foinsa’e sira nia le’et, ne’e sé mak presiza liu tulun, tulun esperitual, material, tulun bà sira nia eskola”.

Bá sarani sira hotu movimento boot sira ne’e nakloke bá ema hotu, sé mak hakarak partisipa tama iha familia saleziana, nia nafatin hola parte iha kreda lokal nia la ses husi buat ne’ebe Dom Bosco hakarak tanba atu servi kreda lokal.

Padre ne’e dehan, tuir Maromak nia dalan hodi serví ne’e nu’udar vokasaun, tan ne’e nia parte sente kontente hatan sim ba Maromak nia bolu.

“Ami senti orgullu, kontenti no agradese bá nai maromak, bolu ami no ami mós hatan, sim bá bolu ida ne’e katak ami nia kna’ar ho padre no madre sira, ami hanesan iha vokasaun ida maibe diferente deit ami la forma familia”. Nia sublinha

Koordenadora Assosiasaun Salezianu Cooporadores (ASC Sigla Portugés), Maria Marcelina Gaio haktuir, ASC ia membru foun 13 tuir promesa no ohin loron rejista  ona membru hamutuk 153.

“Assosiasisaun cooperadores salesiano hari’i iha 1.841, iha ne’ebé hari’i rasik hosi São João Bosco, to’o ohin loron nia membru assosiasaun iha Timor hamutuk 153”. Maria Marcelina Gaio informa

Kordenadora ASC Dioseze Baukau ne’e dehan, sira nia parte sei servisu hamutuk ho Padre Salazianu sira no madre sira hodi hakbesik joven sira ba Maromak.

“Ami sei buka esforsu makas no bele servisu hamutuk ho amu salezianu, madre sira no familia salezianu sira tomak atu fo asisténsia no akompaña, ajuda ita nia joven sira liliu iha diocese Baukau, Parokia Santu António,  ami bele dada sira atu mai hakbesik an bá Maromak duke sira bá buat seluk, halo sira moris ho ksolok, damen no fraternidade liutan”. Nia hakotu

Misa agradesimentu ba promesa dahuluk ne’e hala’o ija Igreza katedral Santu António Baukau, promesa ne’e partisipa hosi ema na’in sanulu resin-tolu (13) kompostu hosi feto na’in 10 no mane na’in tolu.

Jornalista : Conzita Mota & Dircia Baptista Belo