Realiza Kompetisaun Typing, UNTL Sai Ponte Promosaun Ba Estudante Sira

SAPNewsTL, Dili – Universidade Nasionál Timor Lorosa’e (UNTL) liu hosi Vise Reitora Asuntu Estudantis UNTL realiza programa extra-kurikuláriu ho modalidade Typing ba estudante sira.

Gabinete Vise Reitora ba Asuntu Estudante (GVRAE) iha Universidade Nacional Timor Lorosa’e (UNTL) halo abertura ba Programa Jovens Talentos ho Modalidade Typing ne’e realiza iha Salaun Auditóriu Fakuldade Ekonomia no Jestaun.

Vise Reitora Asuntu Estudantis UNTL, Dra. Lígia Tomás Correia haktuir programa extra-kurikuláriu ne’e realiza hodi fo espasu ba estudante sira hodi promove sira nia talentu.

“Programa extra-kurikuláriu ne’e hanaran kompetisaun jovens talentus, ohin ita realiza kompetisaun typing, iha kompetisaun ne’e estudante husi Fakuldade Enjenharia Siénsia no Teknolójia (FEST) mak sai manan na’in dahuluk, daruak no datoluk, ita realiza atividade ne’e ho hanoin ida atu promove estudante sira nia talentu ba futuru, motiva mós sira hasa’e sira nia kunhesimentu no kapasidade”. Tenik Vise Reitora Asuntu Estudantis UNTL, Dra. Lígia Tomás Correia iha Salaun Auditóriu Fakuldade Ekonomia no Jestaun. UNTL, 19/09/2024

Vise Reitora UNTL ne’e dehan atu konkista potensialidade estudante nian, estudante tenki promove nia an rasik no UNTL sei sai ponte hodi promove abilidade estudante nian.

“Atu konkista estudante sira nia potensialidade (Abilidade) espesifíku atu bele promove estudante nia an-rasik no mos UNTL sai ponte promosaun hodi promove estudante sira nia abilidade iha komunidade akadémika no iha públíku”. Nia husu

Vise Reitora UNTL ne’e hatutan, programa ne’ebé ninia gabinete realiza ne’e iha modalidade hitu, programa hirak ne’e realiza tanba hatur ona iha planu asaun anual tinan 2024.

“Kompetisaun Jovens Talentus ne’e iha modalidade 7 mak estudante sira husi kada fakuldade sei kompete; mak Debate Públiku, Diskursu Públiku, Eskrita Sientífika, Typing, Video Kreativu, Dezeñu Gráfiku no Dezeñu Maskot UNTL, programa sira ne’e nu’udar planu anual tinan 2024”. Vise Reitora Asuntu Estudantis UNTL, Dra. Lígia Tomás Correia hateten

Rezultadu kompetisaun Typing, Estudante hosi Fakuldade Enjenaria Siénsia no Teknolojia mak okupa primeiru to’o terseiru lugar, Estudante primeiru lugar ho narain Ligenito C. R. Bucar, Segundu Lugar Bazualdo Xavier no Terseiru Lugar Carmelita Silva.

Estudante ne’ebé hetan primeiru lugar ho Ligénito C. Real Coreia Bucar, husi Departamentu Engenharia Informátika, Fakuldade Engenahria Siénsia no Teknolojia.

Entretantu, Atividade hirak ne’e realiza iha ámbitu komemorasaun dies natalis UNTL ba dala XXIV (24) ne’ebé sei realiza iha loron 17 Fulan Novembru Tinan 2024.

Jornalista : Conzita Mota & Marciana da Conceição