Kapela Ulibidere-Viqueque Aat Desde 1996 ! Sarani Husu Apoia Ba Ema Laran Di’ak Sira

SAPNews TL, Viqueque — Tan fiar ba maromak, tinan 28 nia laran sarani Aldeia Alaoli Suku Wani-Uma Postu Administrativu Uatukarbau Munisipiu Viqueque, obrigadu tenki hamahon an iha kapela Ulibidere, Watukarbau, Paroquia Uatulari, Vigararia Viqueque, Dioseze Baucau, ne’ebe ho kondisaun at ona desde 1996 to’o ohin loron.

Tuir responsavel kapela Ulibidere Jacob da Cruz informa, kapela refere konstroi iha tinan 1996 mai husi inisiativa joventude Watu-Karbau oan sira ne’ebe pertese ba Aldeia Alaoli Suku Wani-Uma nian, ne’ebe hetan autorizasaun husi Amu Bispu sira iha tempu invazaun Indonésia, hodi reorganiza sarani sira ne’ebe rezidente iha area Alaoli nian.

“Iha 1993 komunidade sira mai hela iha ne’e barak ona, entaun iha altura ne’eba amu bispu sira hakarak atu loke ona paroquia, entaun presija loke kapela maibé iha tempu ne’eba kuaze paroquia, ami reorganiza joventude sira ne’ebe pertese mai iha area ida ne’e loke kapela iha area sira ne’ebe populasaun sira hela ba, iha 1996-1997”.Hateten, Responsavel kapela Ulibidere Jacob da Cruz ba Jornalista SAPNews hafoin selebra misa deslutu ba Matebean José da Silva Díria, iha Aldeia Alaoli, Sexta (12/10/2024)

Nia salienta, problema ne’ebe sarani sira enfrenta iha area Alaoli, nia parte hola responsabilidade tan padre paroquia ho autoridade lokal sira hela distansia dok husi sarani sira nia rezidensia, maka nia informa ba padre paroquia ho autoridade lokal sira hodi husu tulun maibé laiha resposta husi parte autoridade lokal.

“Ami sarani sira enfrenta ne’e ha’u nia parte informa ona ba, Xefi suku no Xefi Aldeia sira, maibé ami simu resposta husi sira katak orsamentu laiha, entaun sira fó hanoin mai ami katak organiza sarani sira kontribui osan hodi halo konstrusaun, maibé kuitadu komunidade sira deit hetan osan araska, modo sira ne’ebe ami kuda ema la sosa, komunidade sira maioria moris hanesan agrikultor”. Jacob sublinha

Aktual Professor EBF Dotlita ne’e fundamenta, tuir observasaun kada loron ne’ebe nia parte observa, komunidade sira ne’ebe hela iha area zona foho nian, liu-liu aldeia, Alaoli laiha rendimentu hodi sustenta nesesidade familia no kompra material eskola nian distribui ba oan sira.

“Osan atu sosa lapizeira ho kadernu laiha, dalaruma estudante sira mai eskola, lao deit dalaruma osan ne’ebe hau hetan uza sosa kadernu ho lapizeira fó ba sira, entaun ami atu halo kontribuisaun hodi rekonstrui fila fali kapela ulibidere ba mós todan los” .

Nia hatutan, iha area Alaoli numeru funsionariu ida de’it, maibé ho fuan bo’ot tan haree ba kondisaun kapela ne’ebe hahu dodok ba daadauk, nia parte informa ba nai lulik sira, enkoraja sarani sira hamosu inisiativa hodi serbisu voluntáriu atu bele rekonstrusaun ba kapela refere.

“Iha area ida ne’e funsionariu ha’u mesak deit, entaun ha’u informa ba amu karik bele amu fó hanoin komunidade sira halo serbisu osan ba mina, hahan no sosa kalen ho material sira seluk ha’u mak responde, hafoin husu sarani sira nia konsiensia kontribui kalen tahan ida idak, hodi hari’i fila fali kapela ulibidere sai diak”. Nia fo hanoin

Responsavel kapela Ulibidere ne’e akresenta realmente haree ba kondisaun kapela ne’ebé aat ona, nia sempre kordena ho padre paroquia, tau iha planu halo proposta submete ba parte relevante sira liu-liu parte igreja katolika Dioseze Baucau nian, hodi husu tulun, padre paroquia laiha resposta pozitiva.

“Ha’u haree tinan barak ona kondisaun kapela ne’e grave los, material lokal sira hanesan hadak no ai sira ne’ebe uza ba hari’i kapela dodok hotu ona, sarani sira hanoin atu hadia maibé sarani sira kbi’it laiha atu bele hari’i kapela diak, entaun ha’u dehan ba amu atu halo proposta hato’o ba parte relevante balun, nune’e sira bele apoiu ita, maibé amu hatan mai ha’u dehan ita la’os paroquia, ita kuaze paroquia, kada periode ida, kapela sira ne’ebe pertese ba iha paroquia mak bele hetan apoiu”.

Entretantu, responsavel kapela Ulibidere ne’e husu ba Parokia, lider religiaun katolika Timor-Leste nian no governu hodi bele fó apoiu material ba rekonstrusaun kapela refere sai diak, nune’e sarani sira bele hamahan an ho dignu bainhira partisipa eukaristia santa iha loron domingu.

“Liga ba fiar nu’udar sarani katolika, ami husu ba parte hotu-hotu tau matan mai ami sarani sira iha area Alaoli nian, apoiu, material mai mai hodi bele hadia kapela ida ne’e, nune’e sarani sira mai tuir misa ho seguru,tamba realmente iha area Alaoli nian sarani kada loron domingu mai partisipa eukaristia santa. maibé tempu udan kondisaun kapela nian la permite sarani sira atu bele tuir misa ho seguru, kalen ne’ebe uza hodi taka kakuluk kapela nian dodok hotu ona, ai sira ne’ebe uza mos dodok hotu”.

Antes ne’e, Iha tinan 2023, Bispu Dioseze Baukau Dom Leandro Maria Alves hateten nia parte sei haree kapela sira ne’ebé pertense ba Dioseze Baukau ho fazeadamente tanba seidauk iha rekursu ne’ebé naton hodi hadia kapela sira ne’ebé aat kleur ona.

“Ita sei haree kapela sira ne’ebé aat iha Dioseze Baukau ne’e ho fazeadamente tanba ita nia rekursu limitadu uituan, maske ita nia kapela barak aat, fatin barak laiha kapela, ita sei haree ba oin”. Hateten Dom Leandro Maria Alves iha Luro, 22/08/2023. Arkivu SAP News TL

Enkuantu, Kapela Ulibidere estasaun Watu-Karbau paroquia Watulari Dioseze Baucau, hari’i desde 1996 to’o ohin loron seidauk hetan apoia ruma hosi entidade ruma iha Timor-Leste.

Jornalista: Daniel da Silva