Hakarak Vizita Timor-Leste ! Prabowo Promete Halakon Grupuismu, Partidarismu & Familiarismu

SAPNewsTL Indonésia : Primeiru-Ministru (PM) Kay Rala Xanana Gusmão partisipa serimónia tomada de posse Prezidente Repúblika Indonézia (P-RI) ba períudu 2024 to’o 2029, Prabowo Subianto ho Vise-Prezidente Gibran Rakabuming Raka iha Jakarta, Indonésia.

Prabowo Subianto agradese bá bainaka espesiál sira no hasé Prezidente Repúblika ho Primeiru-Ministru sira hosi nasaun oioin inklui Primeiru-Ministru Timor-Leste, Kay Rala Xanana Gusmão ne’ebé partisipa iha serimónia solene refere.

Tuir informasaun ne’ebé SAPNews asesu liu hosi Pajina Xanana Ba Ema Hotu katak Prabowo Subianto kompromete sei hametin liu tán relasaun di’ak ho nasaun hotu-hotu liu-liu nasaun viziñu sira.

“Liga ho asuntu internasionál, Indonézia hili dalan livre, ita lakohi tuir paktu militár ruma, tanba ita hakarak, ita hili dalan amizade ho nasaun hotu-hotu,” Prezidente Repúblika Indonézia bá dala-ualu ne’e hateten iha salaun Nusantara-Parlamentu, Jakarta, Indonézia, domingu (20/10/2024).

Prabowo mós promete atu durante iha nia ukun hamutuk ho estrutura halakon tiha grupuizmu, familiarizmu no partidarizmu iha indonésia.

Iha okaziaun ne’e Primeiru-Ministru, Kay Rala Xanana Gusmão espresa sentimentu gratidaun tanba bele partisipa iha serimónia posse ne’ebé Prabowo rasik mak konvida.

“Kontente tanba bele partisipa hamutuk ho rai barak iha tomada de pose Prezidente Prabowo. Prezidente nia diskursu temi buat ida kapas tebtebes katak, hanesan Prezidente labele haree de’it bá an, família no grupu, máibé mai atu servi. Hanoin di’ak tebtebes ida ne’ebé ha’u mós sempre ko’alia,” Xanana Gusmão sita diskursu Prabowo iha Jakarta.

Primeiru-Ministru akresenta, Prabowo mós promete atu haree kona-bá problema hahán tanba sira la konsege rezolve problema hamlaha iha sira-nia rain.

“Nia ko’alia buat ne’ebé Indonézia agora enfrenta hela, la’ós de’it kona-bá hahán maibé uma laiha, no laiha servisu. Nia promete katak sei esforsu atu redús tiha problema sira ne’ebé Indonézia enfrenta. Kona-bá relasaun internasionál nia temi liu maka Indonézia tomak apoia Estadu Palestina ne’ebé ita mós apoia maibé nia diskursu orienta liu bá sosiedade no povu atu moris iha dame, labele hirus malu, hodi hothotu bele hanoin bá dezenvolvimentu nasaun,” PM Xanana sublinha.

Xefe Governu ne’e mós observa katak, aktu hosi Prezidente Prabowo ne’ebé presta omenajen bá líder nasaun nian, hanesan aktu ida ne’ebé di’ak tebtebes tanba nia hakarak unidade nasionál, hodi hakotu diferensa saida de’it maka iha, hosi grupu, partidu tenke tau uluk interese nasaun no povu nu’udár devér boot liu ida-idak nia hanoin.

Iha okaziaun ne’e, Prezidente Repúblika Indonézia mós husu bá Primeiru-Ministru, Kay Rala Xanana Gusmão kona-bá vizita Estadu mai Timor-Leste (TL).

“Nia mai komprimenta no husu atu bainhira mak nia bele bá Timor. Ha’u dehan, depois mak ita haree. Ne’ebé kapas tebtebes,” PM Xanana haktuir.

IX Governu Konstisionál define Timor-Leste polítika esterna ho prinsípiu ida-ne’ebé konsagra sentidu independénsia no soberania maka: “Ba Timor-Leste, Laiha Aliadu ka Inimigu, hotu-hotu sei hamutuk no amigus de’it!”.

“Ida-ne’e sai hanesan ita-nia lema ne’ebé sei orienta TL iha Relasaun Esterna, iha konjuntura internasionál ida ne’ebé daudaun ne’e difísil tebes,” Xanana subliña.

Iha serimónia posse ne’e nia rohan, Prezidente Prabowo Subianto ho Vise-Prezidente Repúblika, Gibran Rakabuming Raka komprimenta Primeiru-Ministru, Kay Rala Xanana Gusmão.

Akompaña Primeiru-Ministru Kay Rala Xanana Gusmão partisipa iha serimónia posse ne’e maka Ministru Negósiu Estranjeiru no Kooperasaun (MNEK), Bendito dos Santos Freitas.

Jornalista : Marciana da Conceição