Ke’e Sai Problema Rural ! Oxfam & AJTL Hala’o Média Tour Iha Letefoho
Imajem : Komunikadu Imprensa hosi Oxfam Timor-Leste no AJTL iha Salaun Oxfam Hudi-Laran,19/11/2024
SAPNewsTL, Dili : Oxfam Timor-Leste servisu hamutuk ho Assosiasaun Jornalista Timor Lorosa’e (AJTL) realiza média tour ba postu administrativu Letefoho, munisípiu Ermera.
Sekretáriu Jerál Asosiasaun Jornalista Timor-Leste (AJTL) Acacio Pinto hatete, AJTL hetan tan oportunidade hodi kolabora hamutuk ho jornalista hosi média nasional hala’o média tour ne’ebe foka ba mudansa klimatika iha produtu kafé no preokupasaun sira seluk.
“AJTL hetan tan oportunidade dala ida, lori Jornalista sira husi média nasionál 15, objetivu husi média tour ne’e foka liu ba mundansa klimatika. Objetivu husi média tour ne’e sei foka liu ba iha mudansa klimatika tanba Ermera maioria moris ho kafé, ho mudansa klimatika sira ne’ebé mak sai preokupasaun iha mundu inklui Timor-Leste”. Dehan Sekretáriu Jerál AJTL ba Jornalista sira iha Salaun Oxfam, Tersa (19/11/2024).
Sekretáriu Jerál AJTL salienta, molok organiza jornalista sira ba terenu hodi halo kobertura, AJTL no OXFAM briefing jornalista sira hodi identifika isu mudansa klimátika ne’ebe komunidade sira enfrenta.
“Antes ne’e ami halo ona briefing ba kolega jornalista sira, oinsá atu identifika isu mudansa klimatika ne’ebe ita nia inan aman sira iha foho enfrenta”. Nia subliña.
Iha fatin hanesan, reprezentante OXFAM iha Timor-Leste Adilison da Costa Junior konsidera programa média tour ne’ebe sira hala’o hamutuk ho AJTL importante tebtebes ba jornalista sira hodi hatutan informasaun ne’ebe komunidase sira enfrenta iha area rural.
“OXFAM Timor Leste servisu hamutuk ho Assosiasaun Jornalista Timor-Leste realiza programa média tour ida ne’e, tanba hanoin katak importante tebes ba kolega jornalista sira bele halo kobertura ba problema mak ita nia maluk sira enfrenta iha área rural.” Dehan Adilison da Costa Junior.
Adilson afirma, informasaun barak ne’ebe jornalista fó sai ne’e iha munisípiu Díli no lakon informasaun hosi ema ho defisiénsia no komunidade sira ne’ebe hela iha area rural,nune’e progrma ne’e hodi fasilita jornalista ba kobertura iha area remotas.
“Informasaun hotu-hotu dalaruma iha Dili deit no dala ruma ita mós lakon informasaun husi ema ho difisiénsia no maluk sira ne’ebe hela iha área rurál ne’eba enfrenta, entaun ita realiza programa média tour ba dala tolu iha tinan ida ne’e deside hodi hala’o iha munisípiu Ermera parte Letefoho. Asuntu importante balun ita ko’alia iha briefing kona-ba impaktu mudansa klimátika ba produtu agrikultura liu-liu ba produsaun kafé.” Nia hakotu.
Entretantu, média tour ne’ebé mak Organiza husi Asosiasaun Jornalista Timor-Leste (AJTL) ho OXFAM Timor-Leste hala’o ona média tour ba dala tolu iha munisipiu Lautem, Baucau, no Ermera. Programa ne’e hetan apoiu máximu hosi OXFAM iha Honkong.
Média tour ne’e partisipa hosi Média Nasionál hamutuk sanulu resin lima (15), iha ne’ebé ekipa média tour aranka ona ba Letefoho hodi halo kobertura durante loron tolu (19-21/11/2024), kobertura ne’e sei foku ba mudansa klimátika iha suku rua hanesan Lauana no Katrai Kraik postu Letefoho.
Jornalista : Marciana Da Conceição