Délio Rekunhese Vitória La Ses Hosi Dejafiu, Dixiplina Mak Save Ba Susesu
Imajem : Jornalista SAPNews dada lia ho Boxista Délio Mouzinho iha GMT, Dili,30/11/2024. Foto : Daniel da Silva
SAPNewsTL, Dili : WBC Asia Continental. Xanana Belt & President Belt ne’ebé realiza iha GMT Dili. Délio Mouzinho sente kontente tanba bele manan nia adversáriu Simsom hosi Jakarta-Indonésia iha ronda dahuluk.
“Ha’u sente kontente tebes tanba bele hetan vitória, rezultadu ne’e la’os ha’u mak manan maibé estadu Timor-Leste mak manan”. Tenik Boxista Délio A Mouzinho ba SAPNews iha GMT Dili,30/11/2024
Délio fundamenta rezultadu ne’ebe nia konkista la ses hosi esforsu no preparasaun ne’ebé naruk maske hasoru dejafiu sira hanesan alimentasaun, hetan moras beibeik, saúde ladun estavél maibé dejafiu hirak ne’e la hamate ninia vontade atu luta kontinua no prepara an iha mundu boxing.
“Dejafiu ne’ebé ha’u hasoru mak hahan ladun sufisiente, hetan moras beibeik, kondisaun saúde ladun diak maibe dejafiu hirak ne’e la sai impedimentu ba ha’u nia vontade hodi prepara an”. Délio hateten
Boxista ne’e husu ba joven sira hodi halo buat ne’ebé diak no hadook an hosi buat ne’ebé konsidera ladiak ba futuru.
“Diak liu ita hadok an hosi buat ne’ebé ladiak, halo no hakbesik an ba buat ne’ebé diak hodi dezenvolve an ba futuru, hatudu dixiplina liu hosi han, hemu, deskansa, treinu no kuidadu saúde”. Délio hameno.
Délio Mouzinho mós afirma nia sei kontinua talentu murak ne’e ba futuru hodi kompete iha jogu nasionál no internasionál, joven sira tenki buka hodi kontribui ba paz no estabilidade.
“Ha’u sei la hamate talentu ida ne’e, ita nu’udar joven ita tenki kontribui ba nasaun ne’e laos tenki boot liu maibé bele kria damen, unidade no estabilidade inklui halo buat ne’ebé diak iha ita nia nasaun”. Nia hakotu
Delio A. Mouzinho orijinalidade hosi Postu Administrativu Lore, Munisípiu Lautém. Antes ne’e nia manan ona iha jogu internasionál sira no lori ona medalla mai Timor-Leste.
Eventu ne’e hetan partisipasaun hosi Primeiru Ministru Kayrala Xanana Gusmão, Vise Primeiru Ministru Mariano Assanami Sabino, Ministru Juventude Desportu Arte no Kultura Nélyo Isac Sarmento no hetan partisipasaun maximu hosi sidadaun nasionál no internasionál.
Jornalista : Dircia Belo & Daniel da Silva