Menuz Osamentu ! Délio Husu Tulun Ba Governu & Timoroan Sira
Imajem : Boxista Délio Mouzinho hamutuk ho boxista Simsom hosi Indonésia iha GMT, Dili,30/11/2024. Foto : Media-El Matador
SAPNewsTL, Dili : Hafoin hetan vitória hasoru boxista Simsom hosi Indonésia, Délio Mouzinho husu makaer ukun no Timoroan sira nia tulun hodi apoia nia iha alimentasaun no finanseiru
Boxista Timoroan, Délio Mouzinho husu ba Timoroan sira iha rai-laran no rai-liur hodi kontinua apoia nia iha finanseiru, orasaun no moral liliu osamentu hodi bele apoia nia iha mundu boxing.
“Ha’u husu ba maluk Timor oan sira iha rai-laran no iha ne’ebé deit hodi apoia ha’u, fiar katak to’o loron ida ita sei hetan rezultadu ne’ebé diak liután”. Hateten Délio A. Mouzinho ba SAPNews iha GMT Dili, 30/11/2024
Imajem : Jornalista SAPNews dada lia Boxista Délio Mouzinho
Délio husu ba Ministériu Juventude Desportu Arte no Kultura (MJDAK) no ministériu relevante sira hodi apoia boxista Timoroan sira hodi prepara futuru boxista ne’ebé forte, kompetitivu no kualidade iha futuru.
“Ha’u husu ba governu hodi tau atensaun ba boxista Timoroan sira, ha’u fiar katak governu sei la hamate talentu ida ne’e, maibe kontinua apoia ba oin, nune’e bele prepara nia an diak liután ba jogu iha nivel nasional no internasionál”.
Delio A. Mouzinho hosi Postu Administrativu Lore, Munisípiu Lautém. Fo hanoin fali katak, antes ne’e Délio partisipanona jogu iha nivel internasionál no lori ona medalla mai Timor-Leste.
Eventu ne’e hetan partisipasaun hosi Primeiru Ministru Kayrala Xanana Gusmão, Vise Primeiru Ministru Mariano Assanami Sabino, Ministru Juventude Desportu Arte no Kultura Nélyo Isac Sarmento no hetan partisipasaun maximu hosi sidadaun nasionál no internasionál.
Jornalista : Dircia Belo & Daniel da Silva