Loron 3 Ona ! Lixu Dodok & Iis Iha Fatuhada & Comoro
Imajem : Lixu iha Suku Fatuhada, postu administrativu Dom Aleixu, munisipiu Dili, 14/12/2024
SAPNewsTL Dili : Loron tolu ona, ekipa saneamentu munisipiu Dili seidauk raut foer hirak ne’ebé komunidade timoroan no xineza sira soe iha dalan ninin liliu area Fatuhada, Lurumata, Comoro, Ai-Mutin no Kampung Baru.
Iha entrevista ho komunidade, Suzana da Silva hateten foer ne’e desde loron 12 Fulan Dezembru, ekipa saneamentu munisipiu Dili la mai tula, nune’e oras ne’e lixu aumenta sai barak no dodok iha Fatuhada.
“Foer ne’e komunidade sira soe lor-loron, desde loron 12 Dezembru ekipa saneamentu la mai tula to’o ohin kalan, ita bele haree lixu agora barak los no iis bainhira ita horon”. Tenik Suzana da Silva ba SAPNews iha Fatuhada, 14/12/2024
Suzana hatutan, foer hirak ne’e kuandu la hili ne’e bele lori moras ba komunidade sira tanba ne’e husu ba saneamentu munisipiu Dili atu bele fo atensaun ba problema lixu iha Kapital Dili.
“Ha’u preokupa teb-tebes, favor ida saneamentu munisipiu Dili bele tau matan ba problema lixu iha Dili tanba ne’e fo ameasa ba ita nia saúde”. Nia husu
Tuir observasaun SAPNews nota katak lixeiru iha area Fatuhada nakonu ona ho lixu, iha ne’ebé dodok no dois, problema ne’e akontese mós iha dalan ninin (luron) Fatuhada, Lurumata, Comoro, Ai-Mutin no Kampung Baru.
Maske espasu ba fo’er sei iha maibé komunidade sira mos la soe foer iha fo’er fatin hodi soe fo’er arbiru, problema konsiensia kontinua sai dejafiu ba rezolusaun jestaun ambiental iha Kapital Nasaun Timor-Leste.
Hafoin notísia ne’e publika SAPNews seidauk halo komfirmasaun ho parte Saneamentu munisipiu Dili tanba loron Sábadu no Domingu la’os oras servisu.
Normalmente, kada dader ekipa saneamentu halo hela limpeza iha lixeiru sira maibe durante loron tolu ne’e ekipa saneamentu paraliza sira nian servisu tanba deskonfia seidauk selu sira nia saláriu fulan tolu.
Jornalista : Marciana Conceição