Prevene & Mitiga Mudansa Klimátika ! KI & UNDP Forma Jornalista Hamutuk 28
Imajem : Jornalista sira ne’ebé partisipa formasaun iha Likisa,14/12/2024.
SAPNews TL, Liquiça — Enkuadra Jornalista identifika asuntu ambiental iha Timor-Leste, Konsellu Imprensa (CI sigla Portugués) serbisu hamutuk ho United Nations Development Programme (UNDP) fasilita Treinamentu Jornalismu Ambientál ba Jornalista Timoroan hamutuk 28.
Prezidenti Konsellu Imprensa de Timor-Leste (CI Sigla Portugués) Otelio Ote hateten, jornalista hotu-hotu iha Timor-Leste, hatene kobertura, maibé seidauk iha jornalista balun ne’ebe kobertura espesifiku kona-ba assuntu ambientál entaun, formasaun ida ne’e hanesan asaun importante ida ne’ebe bele eleva koiñesementu Jornalista sira nian kona-ba enviromentu.
“Ita agradese tebes ba formador, tanba bele fasilita ona treinamentu Jornalismu Ambientál ba ita nia belun jornalista sira ho tópiku ne’ebe la hanesan, agora Konsellu Imprensa koopera ho parseiru sira kontinua kapasita jornalista sira” Dehan Prezidenti CI Otelio Ote liu husi nia diskursu iha salaun konferensia Alma do Mar Resort Liquiça, (12/12/2024)
Formador Untung Widiyanto afirma, nia parte senti onradu tebes, tanba bele hasoru-malu ho jornalista Timoroan sira liu husi formasaun Jornalismu Ambientál no enkuadra jornalista sira halo kobertura espesifiku kona-ba preokupasaun públiku liga ba asuntu mudansa klimátika ne’ebe akontese.
“Ha’u hakarak hato’o obrigada barak bá kolega sira jornalista sira tanba ha’u haree imi iha tebes vontade atu aprende no kuriozu los kona bá publiku nia preokupsaun sira, ida ne’e halo ha’u kontenti los tanba ne’e hatudu katak kolega sira iha duni vontade, esperansa no ativu tebes iha parte diskusaun no halo apresentasaun nian, ha’u mós haree katak kolega sira konsentrasaun no partispa maximu tebes iha formasaun durante loron tolu.”
Iha oportunidade hanesan, formandu Mikael Mali Mau, hato’o agradesimentu profundu ba formador tanba ho matenek ne’ebe formador iha bele eleva koiñesementu jornalista Timoroan sira hodi buka hatene asuntu ambiental, no halo mundansa ba estrutura deskreve notisia straight News no feature news kada asuntu espesifiku iha Timor-Leste.
“Ha’u agradese wain ba pak Untung ne’ebé durante loron tolu (3) nia laran fó ona matenek mai ami jornalista sira kona bá hakerek notisia ambiental no mos matadalan, oinsa jornalista sira bele hakerek notisia straight News no feature news kona bá ambiental no materia ne’ebe ami simu ne’e importante tebes atu jornalista sira ida-idak bele implementa iha media rasik”.
Nia hatutan, treinamentu ne’e foku liu ba asuntu rua (2) ne’ebe importante tebes hodi motiva jornalista sira bele tau esperansa ba futuru hodi espalha informasaun ba publiku kona-ba mundansa klimatika ne’ebe akontese iha nasaun Timor-Leste.
“Ha’u haree buat rua ne’ebe importante tebes mak jornalista sira iha esperansa no ida seluk mak jornalista sira iha espiritu vontade atu aprende materia sira ne’ebé sira hetan iha treinamentu, ita bele aplika iha ita ida idak nia media no ha’u mos hakarak fo agradese wain bá pak untung ne’ebé fahe ona formasaun mai ami kona bá mudansa klimatika no oinsa atu hakerek notisia straight news no feature news” Dehan Mikael.
Representante formandu ne’e hato’o mos agradesementu ba Konsellu Imprensa no United Nations Development Programme, ne’ebe organiza jornalista sira hodi tuir formasaun kona-ba Jornalismu Ambientál iha Postu Administrativu Bazartete Munisipiu Liquiça.
Entretantu formasaun ne’ebe hala’o durante loron tolu (3) iha Postu Administrativu Bazartete Munisipiu Liquiça ne’e partisipa husi Jornalista hamutuk nain 28, ne’ebe mai husi Média sira hanesan SAPNewsTL, RTTL.EP, GMN, G-NEWS, Lafa’ek News, Neon Metin, Média Mudansa, Hatutan.com, Timor Post, Radiu Comunidade Comoro, Radiu Liberdade
Jornalista : Ekipa Kobertura