Timoroan 5.000 Iha Korea Sul ! José : Servisu Didiak & Fila Ho Susesu

Imajem : Assistente Adidu Timor-Leste iha Corea do Sul, José Sebastião Coli Soares

SAPNewsTL : Asistente Adidu José Sebastião Coli Soares husu Timoroan sira servisu kuida an, servisu didiak no rai osan hodi dezenvolve moris família nian iha Timor-Leste.

Iha entrevista liu hosii via online ho Asistente Adidu Timor-Leste iha Corea Sul José Sebastião Coli Soares haktuir timoroan rihun lima resin mak servisu iha Korea Sul, nia parte husu ba traballador sira hodi servisu didiak, nune’e bele lori moris diak ba família no kria kampu servisu.

“Mai servisu tenki kuida an, lori osan dezenvolve ekonomia família nian, rai osan fila ba Timor hodi kria fali servisu, mai tenki sai susesu no fila ho bukae ruma, labele mai foto deit iha aeroportu maibe la lori fila buat ida”. Tenik Asistente Adidu Timor-Leste iha Corea Sul José Sebastião Coli Soares ba SAPNews iha Corea Sul,21/01/2025

Eis traballador ne’e dehan, traballador Timoroan ne’ebé servisu iha Korea Sul hamutuk rihun liman resin, entre sira balun iha sistema laran no balun ses an hosi sistema, tanba ne’e nia husu ba timoroan sira hodi kumpri lei traballador.

“Ha’u hanesan maun ba imi, ha’u nia mensajem maka labele ses hosi sistema, karik hasoru problema bele hato’o, ami prontu 24 horas hodi hatan (bele kontaktu no mensajem), labele kontra lei traballador, labele sai barukten iha ne’e”. Asistente Adidu hateten

Assistente adidu ne’e husu ba Timoroan sira hodi kria paz, unidade no estabilidade liu hosi haree malu hanesan maun alin no familia ida iha Korea Sul.

“Servisu kuida an, haree malu didiak, kria paz no sente katak ita Timoroan ida deit, ita diferensa iha Timor-Leste maibe ita mai Korea Sul ho Bandeira ida deit, tau aas interese nasaun nian, kria unidade, estabilidade, sai maun alin no familia ida”. Nia hakotu

Jornalista : Dircia Baptista Belo