Estrada Aat, Komunidade Dada Karreta ! Povu Atsabe Husu Governu Kumpri Promesa

Imajem : Komunidade sira dada karreta bus ne’ebé difisil atu ultrapassa estrada aat iha Atsabe,21/01/2025.

SAPNewsTL, Ermera: Komunidade Postu Administrativu Atsabe preokupa estrada kontinua tanba governu la tau matan ba entrada ligasaun Baboe-Leten, Lauana ba Atsabe & Bobonaro.

Reprezentante Komunidade Baboe-Leten Anastaçio Moises Casamiro husu ba governu hodi tau matan ba estrada ligasaun postu Atsabe tanba tempu udan fo impaktu makaas ba sirkulasaun transporte iha Atsabe.

“Husu ba Parte Nonu Governu (IX) liliu Ministériu Obras Públikas (MOP) hodi fo atensaun no hadia estrada Atsabe, labele haree deit, labele matan delek, to’o tempu eleisaun maka mai iha palku promete masi-midar, depois imi ukun hotu lori masin mai fo iha ami nia postu.” dehan Anastaçio Moises Casamiro iha Suku Baboe-Leten Postu Administrativu Atsabe, 21/01/25.

Nia hatutan, prioriedade ba komunidade Atsabe maka halo konstrusaun ho lalais ba estrada ne’ebé maka ligasaun Lauana ba Atsabe inklui ba Bobonaro

“Bainhira Governu ida ne’e maka mandatu remata, ami Municipio Ermera liliu ba Atsabe Estrada tenki hala’o ona konstrusaun, la’os deit to’o konstrusaun maibè tenki finaliza ona estrada ne’ebé maka durante imi mai promete iha Postu Administrativu Atsabe”.Anastácio Husu

Padre Paroku Atsabe Pe. Fidelio sente triste tanba tempu kampanha halo promesa barak no hetan votus maioria maibe to’o ukun estrada seidauk hadia.

“Ha’u sente triste tanba durante haree no rona governu sira nia promesa ne’ebé maka povu tomak Ermera liliu ba Postu Atsabe fo konfiansa hodi hetan votus maibe estrada sei aat nafatin, ezizi ba parte relevante hodi tau matan ba sosiedade nia prekupasaun ne’ebé maka agora fo impaktu ba sosiedade no povu Ermera liliu Atsabe” Pe. Fidelio hakotu.

Tuir observasaun SAPNews iha terrenu nota katak wainhira tempu udan difikulta tebes movimentasaun transporte sira, iha ne’ebé passajeiru sira obrigadu tenki dada deit karreta hodi ultrapassa dalan hirak ne’ebé superkrítiku.

Ligadu ho preokupasaun ne’e, Jornalista SAP News TL tenta halo mós konfirmasaun ho Administrador Postu Administrativu Atsabe maibé nia parte sei okupadu ho servisu seluk.

Hafoin notísia ne’e publika, SAPNews seidauk halo komfirmasaun ho Ministériu Obras Públikas (MOP) Samuel Marçal ligadu ho asuntu ne’e, maske nune’e maibé antes ne’e nia parte rona ona preokupasaun barak kona ba estrada aat iha Atsabe.

Jornalista: João Marito