Maske Kondisaun Moras ! Papa Hato’o Sentidu Tristeza Ba Vítima Inundasaun Iha Argentina
Imajem : Vítima inundasaun iha Buenos Aires, Argentina, 09/03/2025. Foto : ANSA / AFP / Reuters
SAPNewsTL : Santu Padre Papa Francisco hato’o sentidu kondolénsia no tristeza ba inundasaun ne’ebé akontese iha Buenos Aires, Argentina ne’ebé rezulta ema hamutuk 16 lakon vida no barak hetan evakua.
Tuir informasaun ne’ebé SAP News asesu hosi Vatican News haktuir katak Santu Padre espresa, liuhosi telegrama ida, nia tristeza ba inundasaun dezastroza ne’ebé kona sidade arjentinu Bahía Blanca, ne’ebé situa iha Buenos Aires.
Iha telegrama ne’ebé haruka ba Amu-Bispu Alfonso Azpiroz Costa, O.P., hosi Bahía Blanca, Amu-Papa hatete katak nia “triste” ho notísia kona-ba dezastre naturál ne’ebé “kauza vítima barak no estragu materiál sira”.
“Tuir dadus ikus liu, iha na’in 16 maka mate no na’in tolu maka lakon, inklui feto na’in rua ho tinan 1 no 5”.
Francisco espresa mós ninia “prosimasaun espirituál ba populasaun tomak”, harohan ba Na’i “atu fó kmaan ba sira ne’ebé sofre iha momentu moras no inserteza nian sira-ne’e”, no invoka Maromak nia apoiu ba sira “ne’ebé envolve iha buka sira ne’ebé lakon no iha prosesu todan atu hari’i fali área sira ne’ebé rahun”.
Amu-Papa konfia ba Na’i-Feto Mizerikórdia katak ema hotu ne’ebé afetadu husi katástrofe, Santu Padre haruka ninia bensaun apostólika ba vítima sira.
Fo hanoin fali katak iha loron segunda-feira dadeer, Gabinete Imprensa Santa Sé nian fó sai, Amu-Papa hetan ona informasaun kona-ba inundasaun ne’ebé kona nia nasaun no espresa ninia proximidade, tantu iha hanoin no orasaun ba ema sira ne’ebé afetadu.
Inundasaun estraga ne’e sidade Bahía Blanca no Cerri. Autoridade lokál sira mobilizadu iha operasaun sira salvamentu nian ne’ebé hetan difikuldade tanba inundasaun kuaze totál hosi munisípiu rua ne’e, kauza hosi udan besik milimetru 400 ne’ebé monu iha de’it oras balun nia laran, entre loron-sesta no loron-sábadu.
Desde loron-domingu, bombeiru sira, Defeza Sivil, forsa polísia sira no forsa armada sira buka hela ema na’in tolu ne’ebé lakon, inklui irmán Delfina ho Pilar Hecker, ne’ebé haree ikus liu besik lagoa Cerri.
To’o oras ne’e, seidauk bele hahú sura prejuizu sira tanba difikuldade atu estabelese filafali servisu esensiál sira.
Ligadu ho akontesimentu inundasaun ne’ebé rezulta ema na’in sanulu resin neen (16) lakon vida no infra-estrutura barak hetan estragus, Prezidente Arjentina, Javier Milei, deklara lutu nasionál durante loron tolu.
Iha parte seluk, fo hatene mos katak kondisaun saúde Papa Francisco iha Ospitál Gemelli, Itália oras ne’e sai ona husi perigu no diak uituan, to’o ohin loron Papa kompleta ona loron loron ruanulu resin neen (26 dias, 14/02-12/03/2025).
Jornalista : Marciana Da Conceição
