Veteranos Iliomar Toba, Tanis & Hein Oan Soru Iha Resintu MACLN
Imajem : Veteranu Iliomar-Lautém halibur hamutuk iha resintu MACLN hodi hein Ministru Oan Soru. Dili,12/03/2025.
SAP News TL Dili : Veteranus Munisipiu Lautém postu administrativu Iliomar hamutuk neenulu resin (60) hosi Iliomar mai toba, tanis no hein Ministru Asuntu Kombatentes Libertasaun Nasionál (MACLN) Gil da Costa Oan Soru iha resintu MACLN tanba sente diskriminativu no la justu ba lista edital 2009 no alterasaun estatutu veteranus.
Relasiona ho polémika veteranus ligadu ho lista editál segundu rejistu 2009 no alterasaun estatutu veteranus tanba sente diskriminasaun no viola direitu funu na’in sira nian.
Porta voz Veteranus Iliomar, Carlos da Costa Kódigu Resilafu haktuir veteranu sira hosi Iliomar deside mai Dili hodi halo kontestasaun no hakarak hasoru MACLN Gil da Costa tanba hakarak ezije sira nia direitu no husu klarifikasaun kona ba estatutu Veteranus.
“Ami na’in neenulu resin hosi Iliomar mai Dili tanba konsidera la justu ba rezultadu lista edital 2009 no alterasaun estatutu veteranus ne’ebé haktuir katak mate klosan la simu osan (so família no fen) no kansela veteranu ne’ebé atu simu osan dupla inklui barak martir barak naran la sai”.
Imajem : Porta voz Veteranus Iliomar, Carlos da Costa Kódigu Resilafu
“Ami mai iha ne’e hodi toba no hein to’o aban hasoru MACLN no rona klarifikasaun tuir ami nia preokupasaun hafoin ami fila, enkuantu seidauk hadia ami sei rejiste to’o hetan solusaun liliu lori ba PM Xanana Gusmão, Presidente Repúblika José Ramos Horta no lori ba Parlamentu Nasionál hodi ezije ami nia direitu tanba ami representa sira ne’ebe mate hotu ona iha ai-laran”. Tenik Porta voz Veteranus Iliomar, Carlos da Costa Kódigu Resilafu iha resintu MACLN Comoro,12/03/2025
Porta voz ne’e hatutan, sira sei la retira wainhira la hetan klarifikasaun husi governu liliu Prezidente Repúblika José Ramos Horta, Primeiru Ministru Kayrala Xanana Gusmão, Eis PM Taur Matan Ruak, Jeneral Lere Anan Timur, no Eis Primeiru Ministru Marí Alkatiri.
Veteranu ne’e mos husu ba veteranu sira hodi hamutuk luta hodi halakon diskriminasaun ne’ebe mosu tanba funu mak mosu uluk la’os lei mak mosu uluk.
Veterana Marciana Madeira sente triste no hamonu matan-ween tanba nia inan aman, maun alin no familia sira mate hotu iha ai-laran maibe naran la sai hotu.
“Ha’u nia inan aman, maun alin no familia sira mate hotu iha funu laran, ha’u sente triste tanba sira nia naran la sai hotu, sira nia naran lakon maske sira mate iha funu laran, ha’u simu ona osan maibe ha’u nia familia sira laiha ha’u la aseita, lei ne’ebe governu halo ne’e ami la konkorda tanba funu mak mosu uluk”.Marciana Madeira hateten ho matan-ween
Felismina Norberta da Crus kestiona makaas tanba ema iha knua tolu iha Suku Ailebere nia ema mate hotu, so ema na’in tolu deit mak fila maibe sira nia direitu laiha hodi asesu ba osan ne’e.
“Ema knua tolu Waniapat, Wainur no Herere iha Suku Ailebere-Iliomar, nia ema ba ai-laran mate hotu, sira ne’e nia ema na’in tolu deit mak moris, sira mai maibe sira la simu osan, ohin loron sira nia naran la sai iha lista veteranus, sira nia direitu iha ne’ebé no osan ne’ebé ba sira ne’e atu fo ba se, karik sira moris sira halo servisu fo han ba nia familia sira, sira mate ona, sira nia direitu ne’e oinsa”. Sublinha Felismina Norberta da Crus
Veteranu no veterana hirak ne’e fasilita rasik sira nia transporte no konsumu sira husi Iliomar mai Dili, ohin kalan ne’e sira deside toba deit iha resintu MACLN tanba konsidera la todan hanesan uluk toba iha ailaran.
Fo hanoin fali katak, iha loron 28 fulan Fevereiru 2025, MACLN Gil Oan Soru deklara katak lista edital segundu rejistu 2009 sei nakloke ba reklamasaun no mudansa estatutu veteranus nian ne’e tuir lei ne’ebé aprova iha tinan hirak ba kotuk.
“Lista reklamantes hamutuk to’o ona rihun sanulu resin ida resin, governu kontinua fo tempu halo reklamasaun no kontestasaun, buat sira ne’ebe iha ne’e ita tuir deit lei ne’ebé aprova iha Parlamentu Nasionál”. MACLN Oan Soru sublinha
Enkuantu, tempu ba reklamasaun no kontestasaun sei termina iha loron 14 fulan Marsu 2025, tanba ne’e husu ba veteranu sira ne’ebe seidauk halo reklamasaun karik iha provas ruma bele apresenta.
Deklarasaun kompletu hosi veteranu Iliomar bele akompanha transmisaun direta hosi SAPNews iha link tuir mai :
https://www.facebook.com/SAPNewsTimorLeste/videos/955995646712038/?app=fbl
Jornalista : Cejar Tutuhafa
