Hasoru SEKOMS ! Kontent Kreator sira Hakarak Governu Loke Ramu Google Iha TL

Imajem : Porta voz kontent kreator Manecas Logo dos Santos iha Palasiu Governu Dili,10/03/2025

SAPNewsTL, Díli : Sekretaria Estadu Komunikasaun Sosial (SEKOMS) Expedito Loro Dias Ximenes hala’o sorumutu ho Content Creator Timoroan sira hodi aktualiza ba malu kona-ba esforsu governu hodi loke ramu google iha Timor-Leste.

Sekretáriu Estadu Komunikasaun Sosiál (SEKOMS) Expedido Loro Dias Ximenes hateten, joven content creator timoroan ho kreatividade diak no esforsu hodi lori Timor ba mundu.

“Ohin ha’u enkontru ho jovens content creator Timoroan ne’ebe iha ho sira nia ispiritu makaas ho nia kreatividade ne’ebe diak no durante ne’e sira esforsu lori Timor ba mundu liu hosi sira nia kreatividade ne’ebe sira halo”. Dehan Sekretáriu Estadu Komunikasaun Sosiál Expedido Loro Dias Ximenes ba jornalista sira iha iha Palasiu Governu, 10/03/2025

Expedito hatutan, “Joven sira ne’e ohin ami halo enkontru ida hodi fó hanoin ba malu oinsa Timor-Leste bele iha reprezentasaun Google YouTube, tanba joven sira hosi tinan ba tinan, iha tinan 2024 iha ona assosiasaun barak sai hanesan assosiasaun ne’ebe maka kria kreatividade ne’ebe maka diak, balun content creator iha animasaun nian hanesan komedian, iha turizmu no kultura”.

Sekretariu Estadu ne’e afirma tempu badak sei hala’o enkontru nasionál hidi konvida representasaun google iha Jakarta no Singapura hodi halo enkontru ho jovens kontent kreator sira.

“Ha’u mós esplika ba joven sira katak nonu governu konstitusionál liu hosi Sekretáriu Estadu Komunikasaun Sosiál ho Ministériu Transporte no telekomunikasaun nafatin esforsu, iha tempu badak sei hala’o enkontru nasionál ida no sei konvida reprezentante Google iha Jakarta no Singapura hodi mai enkontru ho jovens content creator sira iha Timor, nune’e bele esplika oinsa pontu forte no pontu fraku, saida maka sai hanesan benefisiu atu sai content creator ne’ebe diak no oinsa uza interner ne’ebe saudavel”. Nia informa

“Maske iha era digital iha prosesu dezevolvimentu digitalizasaun ne’ebe la’o makas tebtebes, konseteza iha mos dezafius bainhira ita sai content creator ne’ebe diak, maibe dezafiu ne’e joven sira sente katak bainhira sai content creator ne’ebe diak ne’e sai benefisiu ba sira nia aan rasik tanba bele rehan reseitas kiikoan balun”.

Nia akresenta, prestasaun kontent kreator sira iha benefisiu boot liu estadu no nasaun maka oinsa Timor bele koñeseidu iha mundu liu hosi lori informasaun Timor nian, la’os deit hosi média, média konvensionais maibe bele mos hosi content creator ne’ebe joven Timoroan rasik iha.

Atu lori Timor ba mundu ne’e ho maneira no kreatividade hosi joven sira nian oinsa hakerek kona-ba Timor nia avansu kultura ne’ebe iha, dezenvolvimentu turizmu no sira mos halo komedian ne’ebe halo kómiku hosi ema hamnasa liu hosi content ne’ebe sira halo ida ne’e mak lori informasaun ba mundu.

Iha fatin hanesan, porta voz Content Creator Manecas Logo Dos Santos dehan sorumutu ne’e hodi ko’alia kona ba oinsa bele iha representasaun ba Facebook, Youtube no Tiktok tanba utilizador sira iha Timor liu husu rihun atus haat mak uza plataforma ida ne’e.

“Ohin ami mai iha ne’e ko’alia ho SEKOMS liga ho konvida google mai, ami propoin katak plataforma prinsipal ne’ebé maka presiza konvida mai Timor-Leste ida maka Faceboock meta, YouTube no TikTok, tanba kuaze 400 mil ital maka sai utilizador ba plataforma sira ne’e”.

“Ami mos husu ba SEKOMS hodi forma assosiasaun ida ne’ebe maka bele ajuda kontribui ba legalidade content creator sira nian, content creator ne’e barak tanba hanoin katak bele hetan direitu ruma iha utilizasaun plataforma hirak ne’e, maibe ita la taka dalan mos katak bele hetan dezafiu iha prosesu tuir mai, entaun ami mos rekomenda para sekoms bele forma assosiasaun ida atu bele asegura direitu sira wainhira content creator sira iha problema”.

Nia hatutan, Sekretáriu Estadu sei kordena ho Ministériu Transporte Telekomunikasaun ne’ebe bele esforsu hodi dada Vibra Otika mai lalais. Iha inisiu dehan katak juñu maibe ita muda fali maiu, se governu ne’e servisu lalais, tanba ita nia internet ne’ebe la kualidade ho velosidade ne’ebe la diak entaun fó vantajen ne’ebe ladiak ba content creator sira.

“Iha dezafiu sira ne’ebe ita enfrenta ida mak rede internet ne’ebe laiha velosidade diak, ita seidauk hetan rekoñesimemtu, durante ne’e ita utiliza hela buat ne’ebe maka ladun iha validasaun ka la indizivel, ema barak hakarak uza maibe la hetan direitu, nune’e meius ne’ebe diak maka liu hosi SEKOMS hodi servisu hamutuk hodi esforsu oinsa bele lori plataforma sira ne’ebe ita uza ba iha prosesu legais”. Nia hakotu

Enkuantu, grupu kontent kreator timoroan sira sei halo petisaun ba google iha loron 13 fulan Marsu tinan 2025 hodi husu representasaun google mai iha Timor-Leste.

Jornalista : Marciana da Conceição & Dircia Belo