MACLN Rejista Reklamante Hamutuk 30.305 ! Kontestante Ermera Barak Liu
Imajem : Ministru Asuntus Kombatentes Libertasaun Nasionál (MACLN) Gil da Costa Oan-Soru iha Salaun 3 de Março Maubai Comoro, Segunda (17/03/2025)
SAPNewsTL, Díli — Dalan ba solusiona polémika kontestasaun hasoru Governu, Orgaun konsultivu asuntu veteranu hamutuk ho Ministru Asuntus Kombatentes Libertasaun Nasionál (MACLN) Gil da Costa Oan-Soru diskute mekanismu solusaun dadus reklamasaun no kontestasaun.
Tuir Ministru MACLN Gil da Costa Oan-Soru hateten, liu husi konvokatóriu reuniaun entre Ministériu Asuntus Kombatentes Libertasaun Nasionál, Prezidenti Kombatentes Libertasaun Nasionál (CCLN) no komisariu munisípiu 13 analiza kona-ba dadus reklamasaun no kontestasaun veteranu ne’ebe veteranu sira hato’o.
“Objetivu sorumutu ne’e hodi avalia kona-ba 60 dias MACLN simu reklamasaun no kontestasaun ne’ebe maka oras ne’e tékniku Ministériu Asuntus Kombatentes arquiva, nune’e bele haree formas oinsa ba dokumentu sira”. Dehan Ministru MACLN Gil da Costa Oan-Soru ba Jornalista sira iha Salaun 3 de Março Maubai Comoro, Segunda (17/03/2025)
Governante ne’e aprofunda, Ministériu Asuntus Kombatentes Libertasaun Nasionál seidauk iha desizaun final ida hodi informa ba públiku kona-ba extensaun tempu rekoilhamentu dadus reklamasaun no kontestasaun husi veteranu sira.
“Konserteza ami seidauk iha desizaun klaru atu halo extensaun tempu, tanba ita hatene katak atu halo extensaun tempu tenki bazeia ba lei, maibé iha lei balun sita kona-ba governu iha kompetensia atu halo desizaun em relasaun ho atividade Governu nian ne’ebe nesesáriu.” Dehan nia
Oan-Soru hatutan hanesan Ministru laiha kompetensia atu deside desizaun definitivu kona-ba prologamentu tempu, nune’e Ministériu konvoka reuniaun ida hamutuk ho Sekretáriu Estadu Veteranu, Prezidenti Kombatentes Libertasaun Nasionál no komisariu sira husi Munisípiu hodi diskute desizaun koletiva liu husi forum.
“Ekipa tekniku MACLN rekolha fila fali dadus pendente desde veteranu rejistradu 2003-2005, nune’e Ministériu bele fo solusaun dala deit bazeia ba alterasaun lei ne’ebe akontese, tanba dadus ne’ebe ami nia ekipa tekniku sira rekolha entre dadus reklamasaun no kontestasaun hamutuk 30.305 ne’ebe mai husi munisipiu 13 inklui Regiaun Administrativu Espesial Oe-cussi Ambenu relata”.
Ministru Gil afirma, tuir dadus ne’ebe Ministériu Asuntus Kombatentes Libertasaun Nasionál avalia entre dadus 30.305 maioria husi Munisípiu Ermera mak hamosu rekerementu barak liu kompara ho Munisípiu seluk.
Dirijente Ministériu Asuntus Kombatentes ne’e hato’o mensajen ba veteranu sira katak, mantein paz no estabilidade hodi garante situasaun kontroladu, labele hamosu manifestasaun, tanba veteranu ne’ebe hetan direitu ba pensaun bazeia ba dadus komprovativu sira ne’ebe aprezenta ho faktus kada munisipiu.
“Hotu-hotu hakmatek lalika tebe rai, tanba liu husi dadus mak sei justifika katak ita bo’ot los ou lae no sira ne’ebe mak testamuña mak sei justifika ita bo’ot sira, no ha’u husu ba hotu-hotu labele falsifika dokumentu tanba liu husi prosessu sei hatene hotu, husu ba hotu-hotu labele halo manifestasaun, emosaun tanba ne’e sei la fo solusaun ba problema”.
Entretantu, iha diskusaun no analizasaun ne’e partisipa husi Ministru Asuntu Kombatentes Libertasaun Nasionál, Sekretáriu Estadu Veteranu, Prezidenti Kombatentes Libertasaun Nasionál, Vice Prezidenti CCLN, komisariu sira husi Munisípiu 13, no RAEOA
Jornalista: Guilhermino Ramos & Marcela Mery
