Lori Krús Iha Fuan, La’ós De’it Iha Kakorok ! Pontífise : Bom Domingu Ramos
Imagem : Sua Pontífise Papa Francisco iha Vaticano, 14/04/2025. Foto : Vatican News
SAPNewsTL, Vaticano : Praça São Pedro iha domingo Palma ne’e simu ema rihun 40 resin hodi komemora Na’i nia entrada iha Jerusalém.
Tuir informasaun ne’ebe SAPNews asesu husi Vatican News haktuir katak Santa Missa ne’ebe prezide husi Kardeál Arjentinu Leonardo Sandri, Papa Francisco haketek katak lori ida-idak nia kruz laos deit iha kakorok maibe iha fuan.
Papa Francisco marka prezensa iha selebrasaun nia rohan hodi dehan ho oin midar no fo bensaun ba sarani sira katak “Bom Domingo Ramos no Bom Semana Santa”. Teni Santu Padre Francisco iha Vaticano, 14/04/2025
Omilia ne’ebe prepara husi Pontífise ne’e sublinha ninia medita jestu no fuan Simão Cirene nian iha Jezús nia dalan ba Kalváriu. Sirene lori krús la’ós atu tulun Jezús, maibé tanba obrigasaun.
Husi sorin seluk, nia haree nia-an partisipa pesoalmente iha Na i nia Paixaun. Nune’e, krús ai ne’ebé Sirene lori mak Kristu nian, ne’ebé lori ema hotu nia sala.
“Sireneu hira mak lori Kristu nia krús! Ita bele rekoñese sira? Ita haree Na’i iha sira-nia oin, rahun tanba funu no mizéria? Hasoru injustisa aat nian, lori Kristu nia krús nunka saugati de’it; ne’e mak dalan konkretu liu atu fahe ninia domin salvadór”, hakerek Amu-Papa.
Pontífise Francisco nia konvite ikus.maka atu lori krús ba sira ne’ebé presiza liu, dada liman, foti sira ne’ebé monu, hakuak sira ne’ebé laran-kraik:
“Maun-alin sira, atu esperimenta milagre boot ida-ne’e mizerikórdia nian, mai ita hili oinsá atu lori ita-nia krús durante Semana Santa: la’ós iha ita-nia kakorok, maibé iha ita-nia fuan.La’ós de’it ita-nian, maibé mós sira-ne’ebé terus hamutuk ho ita hodi sai ema Sireneu ba malu.”
Iha misa nia rohan, Francisco para maizumenus minutu 10 besik sarani sira ne’ebé prezente, hafoin fila fali ba ninia fatin.
Jornalista : Ermelinda Soares