Ohin, Hahú Komboiu Ho Retratu Potífise Romano Husi Lesidere To’o Tasi-Tolu
Imajem : Komunikadu Imprensa hosi Governo no Igreja Católica iha Altar Santo Tasi-Tolu, 25/04/2025
SAPNewsTL, Díli : Governu no Igreja Católica alerta ba públiku katak sábadu sarani sira iha kapital Dili sei halo proseisaun no halo misa boot hodi fo omenajem ba Maktoban Santu Padre Papa Francisco iha fatin santu Tasi-Tolu.
Vigário Episkopal Pastoral Arkidioseze Dili, Padre Juvito informa parte governu no igreja servisu hamutuk ba realizasaun misa iha Tasi-Tolu hodi fo omenajem ba Maktoban Papa Francisco liu hosi halo Komboiu husi Lesidere to’o Tasi-Tolu.
“Komisaun Konjunta ne’ebé kompostu hosi Governu no Igreja, informa ba públiku en-jerál katak, iha loron-sábadu, 26 Abril 2025, oras tuku 9:00 dadeer, sei hahú mobiliza ai-funan, Papa Móvel (Pope Mobile) no Retratu hosi Sua Santidade Amu-Papa nian husi Prasa Estatua Nain Feto Lecidere ba Tasi-tolu”.Hateten Vigário Episkopal Pastoral Arkidioseze Dili, Padre Juvito iha Altar Santu Tasi-Tolu, 25/04/2025
Padre Juvito hatutan Komboiu ho nia route husi Lecidere ba Motael, Nunsiatura Apostólika (sei para minutu ida) hodi omenajem iha Nunciatura apostolika Farol, kontinua husi Motael ba Palásiu Prezidensiál, Fatuhada, Komoro, no konklui iha Tasi Tolu.
Parte ne’e komunidade sira bele asiste iha Estrada tuir route ne’ebe mak iha, hahú husi Lecidere to’o iha Prasa Tasi-tolu.
Iha parte lorokraik, Órgaun Soberanu, Eis Titulares, Membru sira Korpu Diplomátiku no reprezentante sira hosi Ajénsia Internasionál, sei laiha konvite ofisiál no komisaun konjunta (Governo & igreja) prefere atu utiliza veíkulu ho numero matrikula ofisiál nian hodi bele asesu ba área estasionamentu ne’ebé dezignadu ona iha Tasi-Tolu.
Ba sarani sira ne’ebé ho veíkulu privadu, sei para hotu iha tasi-ibun nian nomós Aeroportu Internasionál Nicolau Lobato wainhira parte tasi-ibun Tasi-tolu nian nakonu, wainhira sarani sira husi parte Oeste transporte sei para iha Tibar( Pelican paradise).
Enkuantu, ba mídia sira, komisaun prepara ona fatin ne’ebé dezignadu. Sira ne’ebé hakarak atu hala’o operasaun Drone iha fatin Misa Tasi-Tolu, tenke halo koordenasaun ho komisaun organizadora, atu nune’e bele rejistu. Sei la permite atu utiliza Drone ne’ebé la autorizadu.
Husi biban ida ne’e anúnsiu ba públiku atu labele fiar informasaun falsu husi ema sira ne’ebé mak laiha edukasaun, morál no responsabilidade hodi públika informasaun falsu sira iha média social, hodi hamate espíritu fiar sarani katolika Timor oan hotu atu partisipa ativu iha misa funeral ba Sua Santidade Papa Francisco nian tuir sekuénsia ne’ebé mak hato’o.
Fo hanoin mos katak parte PNTL no F-FDTL preparadu hodi fo segurança no susesu ba misa solenidade ne’ebé atu fo omenajem ba Maktoban Papa Francisco ne’ebe hakotu iis iha loron 21 Abril 2025.
Tuir observasaun SAP News TL iha Tasi-Tolu nota katak komisaun sira halo ona dekorasaun, limpeza, hatur kadeira no monta ekipamentu pezadu sira ba serimonia misa-boot iha Tasi-Tolu.
Jornalista : Ermelinda Soares