Ai-funan & Retratu Pontífise Romanu Hafalun Altar Santu Tasi-Tolu
Imajem : Ai-funan no retratu Pontífise Romano hafalun altar santu Tasi-Tolu, 26/04/2025
SAPNewsTL, Díli : Hafoin komboiu ho retratu Papa Francisco husi Lesidere to’o Tasi-Tolu. Oras ne’e retratu Pontífise Romano no ai-funan hafalun ona Altar Santu ne’ebe antes ne’e presize misa iha ne’ebá.
Ai-funan no retratu Papa nian ne’e halibur hosi instituições oioin ne’ebe antes ne’e presta omenajem ba Santu Padre iha loron 22-25 Abril iha Estátua Na’in Feto Lesidere.
Durante komboiu, sarani sira akompanha ho reza tersu no hananu to’o iha Tasi-Tolu, iha dalan sarani sira halo sinal salvasaun, kari ai-funan no hamonu matan-ween tanba lakon ona Papa Francisco iha mundu.
Ai-funan no Komboiu refere nu’udar sinal hodi fo omenajem ba Maktoban Santu Padre Papa Francisco ne’ebe hakotu iha ho idade 88 iha loron 21 Abril 2025 iha Vatikanu.
Oras ne’e Santu Padre nia nia retratu falun ona altar santu Tasi-Tolu, karreta rua ne’ebé antes ne’e tula Pontífise mós iha ona fatin santu Tasi-Tolu.
Liu hosi biban ne’e, governu no igreza husu sarani katolika Timor oan hotu atu partisipa ativu iha misa funeral ba Sua Santidade Papa Francisco nian ne’ebe sei hala’o iha tuku 18:00 loraik iha Tasi-Tolu.
Fo hanoin mos katak parte PNTL no F-FDTL preparadu hodi fo segurança no susesu ba misa solenidade ne’ebé atu fo omenajem ba Maktoban Papa Francisco ne’ebe hakotu iis iha loron 21 Abril 2025.
Tuir observasaun SAP News TL iha Tasi-Tolu nota katak komisaun sira halo ona dekorasaun, limpeza, hatur kadeira no monta ekipamentu pezadu sira ba serimonia misa-boot iha Tasi-Tolu.
Jornalista : Marciana da Conceição