TL Hetan Elizivel Husi RSE ! Rekruta Trabalhador 27.000 Servisu Iha Nova Zelândia

Foto : Emigration New Zealand

SAPNewsTL : Hahú ohin, Recognised Seasonal Employer (RSE) aumenta Timor-Leste sai elejivel hodi rekruta sidadaun timoroan ba serbisu sazonál iha setór hortikultura no vitikultura iha Nova Zelândia.

Tuir informasaun ne’ebe SAPNewsTL asesu hosi website https://www.immigration.govt.nz/ katak hahú iha loron 28 fulan Abril 2025, Timor-Leste elizivel iha eskema RSE hodi rekruta sidadaun timoroan ba servisu iha Nova Zelândia.

“Timor-Leste sei aumenta ba Eskema RSE iha 28 Abril 2025, Timor-Leste sei aumenta ba Rejime Empregadór Rekoñesidu, eskema Empregadór Sazonál Rekoñesidu (RSE) ajuda empregadór sira iha indústria ortikultura no vitikultura nian atu rekruta traballadór sazonál sira hosi rai-li’ur, liuliu hosi nasaun sira Pasífiku nian, bainhira laiha traballadór adekuadu hosi Nova Zelándia”. Sita https://www.immigration.govt.nz/ iha Nova Zelândia, 22/04/2025.

Website ne’e sita katak hahú hosi loron 28 fulan-abríl tinan 2025, Timor-Leste sei aumenta ba lista nasaun sira ne’ebé elizivel hodi bele partisipa iha eskema RSE.

“Empregadór sira sei elejivel atu rekruta sidadaun Timor-Leste nian hodi serbisu iha Nova Zelándia iha indústria hirak ne’e”

“Aplikante sira husi Timor-Leste sei iha rekerimentu saúde ne’ebé hanesan ho aplikante RSE sira seluk hotu. Maibé, tanba la tama iha lista nasaun sira ho insidénsia tuberkuloze ki’ik, aplikante sira sei presiza fornese sertifikadu raiu-X toraks nian ho sira nia aplikasaun”.

Imagem : SEFOPE Rogério Mendonça

Fo hanoin fali katak antes ne’e, governu Timor-Leste liu hosi Secretaria Estado Formação Profissional e Emprego (SEFOPE) Rogério Mendonça hala’o ona enkontru ho parte governu Nova Zelândia hodi rekruta trabalhador timoroan.

Lembra fali katak SEFOPE Rogério Araujo Mandonça informa Governu Nova Zealandia sei rekruta trabalhador Timoroan hamutuk 27.000 hodi ba servisu iha Nova Zelandia tanba konsidera komportamentu diak.

SEFOPE Rogério Araujo Mandonça hateten, prosesu ba Programa Laboral Mobilidade ba Nova Zelandia atinji ona 75%, nune’e Governu Timor-Leste ho Nova Zelandia iha faze preparativu hodi kria kondisoens, molok halo rekrukamentu ba trabalador sira.

“Ha’u hanoin ita iha ona faze 75%, faze preparativu entre Governu Timor-Leste ho Nova Zelandia, entaun fulan fevereiru tinan ne’e ekipa ida sei desloka husi Nova Zelandia mai Timor-Leste hodi kordena ho SEFOPE nune’e ita bele aumenta forsa trabalhu preparativu hodi asina memorandu entendimentu”.Dehan Sekretáriu Estadu Formasaun Profesionàl no Empregu (SEFOPE) Rogério Araujo Mandonça ba jornalista sira, iha salaun Multifunsional Timor Lodge, Quarta (15/01/2025)

Nia hatutan, kriteria ba trabalador ne’ebe atu ba serbisu iha Nova Zealandia jeralmente Governu Timor-Leste aplika tuir Programa Laboral Mobilidade Australia, hodi fó oportunidade ba joventude sira atu ba serbisu iha Nova Zelandia.

“Ita aplika kritéria hanesan ho Programa Laboral Mobilidade Australia, tamba sira ne’ebe aplika iha nasaun sira hanesan Australia, Inglatera, Kanada no Nova Zelandia hanesan deit, nune’e kriteria ba juventude sira mak tenki iha koiñsementu ba lingua no iha kapasidade ba area ruma ne’ebe iha hodi hetan oportunidade”.

Rogério salienta, agora faze preparasaun ne’ebe Governu Timor-Leste hala’o hetan apoiu husi Governu Australia, signifika Timor-Leste tenki prense rekezitus balun hodi kria kondisoens ba Nova Zelandia nian.

“Konserteza Sekretáriu Estadu Formasaun Profesionàl no Empregu sei loke vaga ba públiku hanesan trabalador 55 mill ne’ebe oras ne’e serbisu iha estrangeiru, entaun preprasaun mak Governu Nova Zealandia sei hala’o vizita mai Timor-Leste nune’e Governu Timor-Leste liu husi SEFOPE sei ba vizita fila fali Nova Zelandia hodi hetan komfirmasaun finais”.

Rogério akresenta, kuota ne’ebe Governu Nova Zealandia indika mai Timor-Leste ho total númeru 27 mill valida ba nasaun Asia pasific maibé prioridade númeru kuantidade bo’ot liu mak Timor-Leste, entaun iha 2025 Nova Zelandia sei hasa’e tan númeru.

“Nova Zelandia sei rekruta trabailhador Timoroan 27 mill ba serbisu iha Nova Zealandia, ho rajaun ita nia trabalador Timoroan ne’ebe serbisu iha Australia no Korea hatudu komportamentu diak, nune’e empregador sira husi Nova Zealandia sei halo rekrukamentu ba trabalador Timoroan sira tuir prosesu ne’ebe Governu estabelese” Nia hakotu.

Antes ne’e, Embaixadora Timor-Leste nian ba Nova Zelandia, Idelta Rodrigues konfirma Governu Nova Zelandia iha vontade atu implementa Programa Mobilidade Laboral hodi bele lori traballador timoroan ba serbisu iha Nova Zelandia, nune’e traballador sira sei simu salariu kada oras $24.97 ekivale ba dolar Amérikanu liu rihun $10-resin.

Notisia kompletu bele asesu informasaun detallu liu hosi link tuir mai :
https://www.immigration.govt.nz/about-us/media-centre/news-notifications/timor-leste-to-be-added-to-recognised-employer-scheme

Jornalista : Marciana da Conceição