Ekipa Konjunta Kaptura Pratikante Jogu Online Ilegal Iha Bebonuk & Manleuana
Imajem : PNTL kaptura autor pratikante jogu online iha Dili,09/07/2026. Foto : SRP
Sapnews Pro, Dili : Ekipa konjunta Servisu Sekreta husi Polísia Nasionál Timor-Leste (PNTL), Servisu Nasional Intelijensia Estratejika(SNIE) no Polisia Sientifika Investigasaun Kriminal (PCIC) asegura sidadaun estranjeiru nain 99 iha Bebonuk no 29 iha Manleuana ne’ebe deskonfia envolve iha atividade jogus ilísitu online iha Dili.
Tuir publikasaun ne’ebe Sapnews.com asesu liu hosi Pagina Serviços Relações Públicas haktuir katak ekipa konjunta konsege sobu rede boot hirak ne’e tanba deskonfia iha atividade jogus online illegal no Scam Call Centre ne’ebe lokaliza iha Aldeia 20 de Setembru, Suku Bebonuk, Munisípiu Dili.
“Durante operasaun, ekipa identifika grupu bot ne’e utiliza teknolojia avansada hodi halo operasaun iha kapital Dili. Ekipa mós preende evidensia sasán eletróniku barak, inklui komputadór hamutuk unidade 88, laptop unidade 13 no telemóvel atus ida resin”. Sita Pagina Serviços Relações Públicas, Dili,09/07/2026
Hafoin sobu ekipa halo kedas identifikasaun ba ema nain 99 hodi submete ba prosesu investigasaun hafoin sei prosesu ba Ministeriu Publiku.
Antes ne’e, Autoridade Seguransa liu hosi Servisu Migrasaun halo fiskalizasaun no identifikasaun ba sidadaun estranjeiru nain 29, ne’ebé aluga uma iha Aldeia Lemokari, Suku Manleuana, Postu Administrativu Dom Aleixo, tanba deskonfia pratika mós iha aktividade jogu ilísitu online.
Hafoin lokaliza sidadaun estranjeiru hirak ne’e, ekipa servisu kontatu kedas ba Departamentu Servisu Investigasaun Kriminal (DSIK), tanba iha indisius ba prátika jogu ilísitu online ne’ebe kategoria jogu ilegal no la iha dokumentus legal ruma, nune’e ekipa halo ona aprensaun ba ekipamentus ne’ebé uza hodi apoiu jogus ilegais refere.
Ekipamentus hirak ne’e maka hanesan, modem wireless, Laptop, kama andar no-mos karteiras ne’ebé partensia ba uma andar nia laran.
Daudaun ne’e suspeitu 29 ne’e hamutuk ho evidensia entrega ona ba DSIK lori kedas ba Komandu Jerál PNTL hodi submete ba prosesu investigasaun ne’ebe klean liutan.
Operasaun ne’e hatudu duni governu no forsa seguransa Timor-Leste nia seriedade atu kombate krime transnasionál ne’ebé tenta buras iha ita-nia nasaun.
