Kardeal Virgílio : “Lakon Aman & Figura Di’ak, Ita Reza Ba Amu Du”.

SAPNewsTL, Díli : Relasiona ho Falesimentu Padre Domingus Soares da Silva “Maubere”, Kardeal Virgílio do Carmo da Silva informa familia no igreja prepara ona oráriu ba serimónia venerasaun no funeráriu, nune’e tuir planu sei halot iha Semitériu Ailok-Laran.

“Lalaok ne’ebe diocese hamutuk ho familia determina nia oráriu ba fúnebre, hafoin misa iha Kapela Nossa Senhora de Lurdes HNGV, kontinua vizita ikus ba sarani Letefoho, loron 17 Maiu sei mai fali Díli hodi prepara ba fúnebre”. Informa Kardinal Virgílio do Carmo da Silva iha HNGV Díli, 16/05/2025

Kardinal Dom Virgílio do Carmo da Silva konsidera Padre Domingos Maubere hanesan aman no fígura diak ida ne’ebe lakon iha sarani sira-nia leet.

“Ita hotu laran susar tanba ita lakon Amu Domingos iha ita hotu nia leet, ita mós agradese ba maromak tanba nia mai hanesan aman vokasaun diak ida no figura ida ne’ebe ita hotu admira ita nia rain”.

Dom Virgílio akressnta, “aban mai fali ita hotu sei ba simu fali nia mai iha Bekora, husu ba sarani no ema hotu atu ita hatudu sinal domin nian hodi reza no nia mos husik hela mai ita matak, malirin no tulun nafatin ita sira

ne’ebe la’o hela iha ne’e”.

“Segunda-feira, loron 19 Maiu maka misa ikus fúnebre ba Padre Domingus nian iha Katedral, depois sei ba halot iha Semitériu Amu-Lulik sira-nian iha Ailok-Laran, Maloa, Díli”.

Kardeal Virgílio husu ba sarani sira ne’ebe iha Díli no balun ne’ebe hakarak presta omenagen bele halo iha loron sábadu husi meiudia to’o Domingu iha Parokia Bekora.

“Bainhira ita lakon ema ida ne’ebe hadomi no ema ida ne’ebe besik mai ita ne’e dala barak laos fasil maibe iha situasaun sira ne’ebe defisil hanesan ne’e maka ita nia proximidade, solidaridade ne’e duni iha momentu ida ne’e”.

Igreja hamutuk ho família fo agradese ba parte hothotu ne’ebe halo esforsu liliu governu hodi fasilita ba halo tratamentu iha rai-liur no iha HNGV.

“Familia hamutuk ho diosece agradese ba imi hotu nia proximidade mai katak familia no Diosece la mesak tanba imi hadomi Amu Domingos tanba nia servisu durante nia moris nia domin halo ita besik ba maromak”.

“Ita hotu senti lakon maibe ita iha hela tempu paskua nian no ita hatene katak tempu paskua ne’e fo mai ita forsa no esperansa, mai ita hotu laran metin nafatin no akonpanha amu Du, reza ba familia atu iha tempu ida ne’e nia laran”.

Dom Virgílio husu ba ema hotu hodi halo orasaun no hein katak Padre Domingos Maubere nia harohan daet bele haraik matak, malirin no damen ba timoroan hotu.

“Ita sente lakon aman no maun, atu husi Amu Du nia harohan daet bele haraik nafatin matak malirin mai timor oan tomak liu liu ba foinsa’e sira atu bele nafafin moris diak no dame”. Nia sublinha

Iha sorin seluk, Inácio Moreira ho laran triste no hamonu matan-ween hodi dehan Padre Domingos Maubere nia ema ida ne’ebe brani, fo an, tulun na’in, hanoin krítiku no herói ne’ebe salva ema guerileiru barak iha funu laran.

“Padre Domingos Maubere, nia ema ida hala’o misaun tinan haatnulu resin ualu (48) nu’udar na’in lulik, nia servisu iha Viqueque, Díli no fatin barak, nia sempre hatudu iha hahalok ho fiar, brani, domin no fuan boot hodi servi sarani sira to’o nia hetan moras no hakotu iis”.

“Ita triste tebe-tebes tanba ita lakon ema ida ne’ebe hadomi no defende ema kiik no ema kbiit laek sira, ita hotu bele aprende husi nia no banati tuir hahalok heroiku ne’ebe nia halo ona ba ita hotu, nia salva guirileiru barak no inspira ema barak durante nia sei moris”.

Inácio Moreira mós lori família nia naran fo agradese ba governu, doutor sira iha rai-liur no Ospital Nasional Guido Valadares (HNGV) ne’ebe durante ne’e fo asisténsia médika ba Padre Domingos Maubere to’o minutu ikus nia hakotu iis.

“Ami agradese ba governu no doutor sira hotu iha rai-liur no rai-laran ne’ebe fo tratamentu ba Padre Domingos Maubere to’o ohin dader ne’e nia hakotu iis hodi fila ba Aman Maromak, ita hotu kontinua reza ba Padre Domingos hodi hetan fatin diak iha lalehan”. Nia husu

Iha Ioron 11 fulan Maiu 2025, Primeiru Ministru Kay Rala Xanana Gusmão mós hala’o ona vizita ida ba Padre Domingos Maubere iha ICU-HNGV maibe kondisaun saúde krítiku.

Fo hanoin fali katak Padre Domingos Maubere hala’o ona tratamentu ba nia saúde dala barak iha rai liur maibe doutor sira foti liman no la konsege salva nia vida.

Iha loron 13 fulan Maiu, foin lailais ne’e, hafoin fila hosi Vaticano, Kardinal Dom Virgílio do Carmo da Silva mós hala’o vizita no fo bensa ba Amu Domingos Maubere maibe infelizmente Maromak bolu ona nia hodi fila ba Aman Maromak nia poder santu iha lalehan leten aas liu.

Tuir planu, Mate-isin Saudozu Padre Domingos Maubere translada ba rai moris fatin, Postu Administrativu Letefoho Munisípiu Ermera, kalan ida iha Letefoho, hafoin sei lori hikas mai Parokia Sagrado Coração de Jesus Beroka iha tuku 1:00, loron 17 Maiu.

Tuir mai, igreja sei halo misa fúnebre iha Igreja Sé Catedral, Villa Verde Díli, iha tuku 10:00, loron 19 Maiu 2025, hafoin sei halot Padre Domingos Maubere iha Semitériu Ailok-Laran Díli.

Jornalista : Ermelinda Soares & Dircia Baptista Belo