PM Xanana Garante 100% ! Outubru, TL Tama ASEAN

Imagem : Primeiru Ministru Kay Rala Xanana Gusmão iha Malásia, 26/05/2025. Foto : Média PM

SAPNewsTL, Malásia : Iha fulan Outubru 2025, Primeiru-Ministru (PM), Kay Rala Xanana Gusmão iha konfiansa totál katak Timor-Leste (TL) sei hetan aseitasaun atu sai nu’udár membru plenu iha organizasaun rejionál Association of Southeast Asian Nations (ASEAN).

Primeiru-Ministru, Kay Rala Xanana Gusmão manifesta konfiansa hateten Timor-Leste halo ona progressu signifikativu, iha mós kumprimentu bá kritériu sira ne’ebé estabelese ona.

“𝐈𝐭𝐚 𝐡𝐞𝐢𝐧 𝐤𝐚𝐭𝐚𝐤 𝐩𝐫𝐨𝐬𝐞𝐬𝐬𝐮 𝐢𝐝𝐚-𝐧𝐞’𝐞 𝐛𝐞𝐥𝐞 𝐤𝐨𝐧𝐤𝐥𝐮𝐢 𝐭𝐨’𝐨 𝐢𝐡𝐚 𝐭𝐢𝐧𝐚𝐧-𝐧𝐞’𝐞 𝐧𝐢𝐚 𝐫𝐨𝐡𝐚𝐧, 𝐛𝐞𝐥𝐞 𝐦𝐨𝐬 𝐚𝐤𝐨𝐧𝐭𝐞𝐬𝐞 𝐢𝐡𝐚 𝐨𝐮𝐭𝐮𝐛𝐫𝐮, 𝐛𝐞𝐥𝐞 𝐡𝐞𝐭𝐚𝐧 𝐚𝐩𝐨𝐢𝐮 𝐡𝐨𝐬𝐢 𝐧𝐚𝐬𝐚𝐮𝐧 𝐦𝐞𝐦𝐛𝐫𝐮 𝐬𝐢𝐫𝐚 𝐀𝐒𝐄𝐀𝐍 𝐧𝐢𝐚𝐧,” Kay Rala Xanana Gusmão hateten bá média antes partisipa sesaun reuniaun líder sira ASEAN-AIPA (Associação Interparlamentár ASEAN nian) bá dala-14 iha ámbitu Kúpula ASEAN bá dala-46, segunda (26/05/2025).

PM Xanana deklara katak, TL halo ona buat di’ak no kumpre maioria rekézitu sira ne’ebé estabelese ona, klaru katak sei iha nesesidade rua ka tolu ne’ebé tenke kumpre tán no oras ne’e daudaun iha hela esforsu bá ida-ne’e.

Rekorda fali katak, Timor-Leste hato’o pedidu bá dala uluk atu adere bá ASEAN iha tinan 2011 no konsege simu hanesan observadór iha reuniaun altu nível iha tinan 2022. Maski nune’e, prosessu kompletu bá integrasaun sei kontinua iha faze avaliasaun.

Ministru Negósiu Estranjeiru no Kooperasaun Timor-Leste, Bendito dos Santos Freitas, antes ne’e mós hateten katak, inkluzaun totál iha ASEAN la’ós de’it importante bá benefísiu ekonômiku, maibé mós atu fortalese aspirasaun Timor-Leste nian iha nível rejionál.

Durante abertura Simeira ASEAN ba dala 46° ne’ebé hala’o iha Kuala Lumpur, Primeiru-Ministru Malázia Seri Anwar Ibrahim deklara Timor-Leste sei hetan adezaun tomak iha Simeira ASEAN ba dala 47 iha Kualu-Lumpur, Outubru 2025.

Primeiru-Ministru hato’o nia apresiasaun, gratidaun, no rekoñesimentu kle’an liu ba parte hotu-hoturejionál, tantu iha ASEAN nia laran no liután ne’ebé maka kontribui maka’as ba marka signifikativu.

Primeiru Ministru ne’e elojia sira nia dedikasaun, kooperasaun, no kompromisu metin ba solidariedade no inkluzividade rejionál.

“Ida ne’e marka momentu istóriku ida la’ós de’it ba Timor-Leste, maibé ba família ASEAN tomak.Viajen Timor-Leste nian ba adezaun tomak reflete ita-nia vizaun koletiva ba ASEAN ida ne’ebé unidu, koezivu, no haree ba oin,” Primeiru-Ministru Anwar afirmaafirma iha Kuala-Lumpur, 26/05/2025