Tatoli Realiza Semináriu ! Assanami : Jovens “Dixiplina, Badinas & Esforsu”.
Imajem : Vise Primeiru Ministru Mariano Assanami Sabino iha Salaun UNITAL Becora, 07/07/2025. Foto : Média-GVPM
SAPNewsTL, Díli – Tatoli kolabora ho UNITAL realiza semináriu hodi selebra ezisténsia ba dala IX, Mariano Assanami Sabino husu joven sira hodi hatudu “dixiplina, badinas no esforsu” tuir prinsipiu lutador sira-nian.
Orador prinsipal, Vise Primeiru Ministru Mariano Assanami Sabino hateten kontrusaun damen importante ba Timor-Leste iha tempu resistênsia no ukun an.
“Ita hamosu plano da pas ida, maske planu da pas ne’e nia konteudu indonesia ladun simu no ladun la’o, maibe mundu internacional apresia halo dialogu oioin iha interna no hamosu dialogu entre timoroan hotu”. Dehan Vise Primeiru Ministru Mariano Assanami Sabino iha Salaun UNITAL Becora, Segunda 07/07/2025.
Governante ne’e teni, “mosu mós rekonsilasaun dare primeiru, rekonsilasaun dare segundu, antes tama ba referendu, kontrusaun da pas ne’e fundamentu tebes, ne’e obrigasaun no dever ida importante tebes no reponsabilidade bo’ot tebes husi jerasaun ba jerasaun”.
“Depois funu naruk ita defende estabilidade, defende direitus umanus, defende dignidade umana, defende oinsa ema ho ema tenki iha kondisaun moris ne’ebe diak”.
Assanami Sabino sublinha, ho espíritu konstrusaun damen mak Timor-Leste sai pioneiru ba hari’i G7+, sai membru Komunidade dos Países da Língua Portuguesa (CPLP), Membru Organização Mundial da Comércio (OMC), no fulan Outubru mai sei sai Membru Plenu ASEAN.
Assanami dehan konstrusaun karakter importante tebes, presiza forma ema sai sidadaun ne’ebe “dixiplina, esforsu, badinas”, luta nafatin ho espíritu resiste hodi manan no servisu makaas ba interesse nasional.
Presidente Tatoli Noemio Falcão
Presidente Tatoli, Noemio Falcão hateten seminariu ne’e realiza hodi selebra ezisténsia Tatoli ba dala IX ho objetivu hakerek governante ba universidade sira.
“Tatoli hanesan Mídia ida ne’ebe iha tinan 2017 liu husi konsellu ministru deside hanesan institutu públiku no mídia estadu nian, tinan sia (9) nia laran hanoin katak tempu para atu hola papel hanesan mídia estadu ne’ebe maka kolabora ho universidade hotu-hotu”.
“Ami hala’o ona iha Primeiru edisaun ba seminariu nasional ho tema hanesan iha DIT, ohin iha UNITAL, ami fiar katak kolaborasaun ne’e sei kontinua nafatin ho Reitor nia kolaborasaun”. Dehan Presidente Tatoli Noemio Falcão
Noemio Falção sailenta objetivu prinsipal maka atu hakbesik ba ukun na’in ba estudante sira, iha tempu ida agora, importante tebes ba avansa teknológia sira hotu, oinsa mak kampus bele iha debate, konseitu estudu ba saude, vizaun estratéjika ba desenvolvimentu.
Sekretáriu Estadu Komunikasaun Sosial (SEKOMS) Expedito Dias Ximenes konsidera hametin parseira importante tebes ba komunikasaun públiku hodi kombate desinformasaun no misinformasaun hodi intensiva no apoia liberdade imprensa no expresaun iha Timor-Leste.
“Parséria ida ne’e hanesan xave ba kimunikasaun públiku no instituisaun ensinu superior hotu bele kolabora hamutuk ho forma sólida iha étika profisionál, iha servisu ba interese nasionál, parséria ida ne’e presiza ita-nia partisipa liu husi asuntu importante hodi hadia sai kualidade”.
“Kontra dezinformasaun hodi insentiva no apoia ba liberdade imprensa, liberdade expresaun ne’ebé la ses husi responsabilidade, UNITAL hanesan instituisaun akadémiku ne’ebé iha papel estratéjiku no fundamental baa dezenvolvimentu umanu”.
Expedito hatutan, “Universidade ne’ebé kapasita teoria no prátika ba estudante hotu-hotu, instituisaun akadémiku bele hala’o estudu no peskiza kona-ba atendimentu hotu iha polítika, ekonomia sosiál no kulturál”.
“Rezultadu peskiza bele sai baze nu’udar alternativa ba polítika ne’ebé atu uza sira-nia opsaun hodi deside nasaun nia futuru. ita hotu-hotu iha misaun komum, objetivu eduka, forma no empodera koñesimentu ba povu Timor-Leste”. Hateten Expedito
Semináriu ne’e hetan partisipasaun maksimu hosi Reitor UNITAL Claudino Ninas Nabais, estudante UNITAL, estudante UNTL no konvidadu sira.