Selebra Tinan Jubileu ! Pe. Tiago : “Orasaun & Eukarístia Mak Forsa Ba Ultrapasa Dejafiu”.
Imajem : Padre Tiago Soares da Costa selebra tinan Jubileu ba tinan 25 iha Soibada, 13/08/2025
SAPNewsTL, Manatuto : Iha selebrasaun vida Sacerdotal tinan ruanulu resin lima Bodas de prata, Amo Paroku Luro Tiago Soares da Costa hateten orasaun no eukaristia mak hanesan forsa ida iha vida Nai Lulik maske hasoru dezafiu oi-oin maibe maromak sempre haforsa tanba konfia iha na’i sempre hetan solusaun.
Guilhermino Ramos da Cruz – SAPNewsTL
Iha intrevista Pe. Tiago Soares da Costa haktuir sente haksolok no agradese tanba maromak bele haforsa no guia nafatin hodi ohin bele selebra tinan ruanulu resin lima vida sacerdotal .
“Ba selebrasaun Jubileu Sacerdotal ida ne’e sente agradesivu, agradese ba Maromak tanba Maromak bele guia, habiit no haforsa ha’u durante tinan ruanulu resin lima, ohin haksolok hodi agradese hamutuk ho ha’u nia sarani sira no familia sira hotu husi ne’ebe deit bele husik nia tempu hodi mai haksolok hamutuk iha loron ohin”. Dehan Pe. Tiago Soares da Costa liu husi nia intrevista ho Jornalista SAP News TL hafoin missa agradesimentu iha igreja Soibada, 13/08/2025
Padre Tiago dehan maske hasoru dezafiu barak iha vida sacerdotal maibe nafatin firme no la tauk tanba sempre konfia iha maromak.
“La’o iha nakdoko, iha situsaun ne’ebe difisil kontradisoens bar-barak maibe sempre forte no metin nafatin, iha kna’ar ida ne’e hasoru difikuldade oi-oin maibe sempre hetan solusaun no grasa Maromak nian tanba lema ne’ebe ha’u foti katak “Hakmatek, Ha’u mak ne’e, Keta Tauk”, ne’e Jesus sempre hamutuk nafatin ho ha’u iha kna’ar sira hotu ne’e duni kuandu foti desizaun ruma la sente tauk, ha’u tau konfiansa tomak katak Kristu la husik ha’u mesak”. Tenik Amo Tiago
Pároco Luro ne’e mos informa “Bodas de pratas Jubileu da pratas ne’e katak preparasaun ba tinan limanulu entaun ida ne’e tuir lalaok sira hateten iha tinan ruanulu resin lima ne’e tenke iha ano salvatiku no ano de grasa, Jubileu ne’e katak ita buka atu iha pasensia nia laran hodi hetan grasa ruma”.
“Tanba ne’e husi uma kreda Amo Papa husi nia ensíklika sira hodi haruka atu iha tinan 2025 ne’e selebra Jubileu da esperansa, ami mos selebra ami nia vinte e cinco anos tanba Jubileu da esperansa ne’e hahu iha tinan 2000 to’o tinan 2025, ne’e tinan ne’ebe selebra vinte cinco anos entaun ami mos selebra ida ne’e”. Katak Padre
Padre ne’e haklean ho espiritu Jubileu nu’udar tinan grasa ida ne’e atu brani nafatin, servi hodi konsiente katak hirak ne’e hotu tanba knaar espiritu santu nian.
“Ho espiritu Jubileu ne’e katak ita brani atu prontu nafatin ho grasa Maromak nian, servisu nafatin iha espiritu santu nian, nune’e buat ne’ebe ita hala’o ne’e la’os ita maibe tanba espiritu santu nia servisu”. Amo hato’o
Amo Tiago hatutan “Nu’udar Nai-Lulik ne’e eukarístia ne’e mak sai hanesan forsa ba Nai lulik ho eukaristia lorloron nian no reza orasaun pesoal katak laos ha’u mesak deit maibe Kristu rasik hamutuk ho ita, ne’e duni iha situasaun ne’ebe ha’u sente labele mas sente forte nafatin tanba espiritu santu nia servisu, orasaun no eukaristia”. Nia akresenta
Nia aumenta la la’o mesak nafatin, sempre konfia nafatin iha maromak katak maromak sempre hamutuk ho ema ida-idak maka buat hotu maromak mak deside.
“Esperansa ba oin, ha’u bele halo buat hotu maibe Nai mak deside ne’ebe esperansa katak la’o ba oin laos la’o mesmesak, konfia nafatin iha Maromak maske sempre hasoru nafatin dejafiu oi-oin maibe buka atu hamutuk nafatin iha maromak nia servisu”. Nia sublinha
Entretantu, Padre Tiago Soares da Costa simu ordenasaun sacerdotal iha loron 13 fulan Augusto tinan rihun rua no hala’o nia missa moruk iha Santuario Nossa Senhora Aitara Soibada.