Embaixadora Idelta : Loron FALINTIL, Joven Presiza Aprende & Luta Ba Dezenvolvimentu
Imajem : Embaixadora Timor-Leste ba Nova-Zelándia, Idelta Maria Rodriguês
SAPNewsTL, Díli : Iha ambitu komerasaun tinan 50 ezistensia Forças Armadas de Libertação Nacional de Timor-Leste (FALINTIL), Embaixadora Timor-Leste ba Nova-Zelándia, Idelta Maria Rodriguês, konsidera momentu komemorativu hanesan tempu ida atu reflesaun ba sakrifísiu patriota sira no kontínua investe iha patriotismu foinsa’e.
Guilhermino Ramos & Marcela Mery — SAPNewsTL
Iha intervista Embaixadora Timor-Leste ba Nova-Zelándia Idelta Maria Rodriguês hateten, tinan 50 komemorasaun ezistensia FALINTIL, hanesan pasu signifikativu ba jerasaun foun no povu Timor-Leste (TL) atu aprende husi istória heroi no heroina sira nia luta hodi kontribui ba prosesu dezenvolvimentu nasional.
“Komemorasaun ida ne’e fó oportunidade ba ema hotu liu-liu ba foinsa’e sira, atu aprende husi istória patriota sira-nian, no kontinua hametin nasaun liu husi imi-nia ideia diak ne’ebé durativu hodi eduka gerasaun foun, preserva no hatutan doutrina sakrifisiu patriota nian”. Dehan Embaixadora TL ba SAPNews iha Auditorium Fakuldade Ekonomia Jestaun UNTL, Colmera, Tersa (19/08/2025)
Representante Estadu Timor-Leste ba Nova-Zelándia ne’e fundamenta, ho espiritu nasionalismu no patriotismu ne’ebe heroi sira husik hela, fó memoria importante ba timoroan hotu-hotu hodi halo reflesaun ba luta heroi sira, no pasu reflesaun ba dezenvolvimentu.
“Ita tenke halo reflesaun ba ita-nia atinjimentu ne’ebe mak ita iha, ita mós labele haluhan investe ba patriotismu foun sira, atu bele kontinua luta laiha limitasaun, luta ba dezenvolvimentu ida sustentavel no iha bem estar ba povu tomak”.
Tuir feto potensial ne’e dehan, eventu komemorativu ida ne’e povu mós bele hanoin fila fali, sakrifisiu patriota sira ne’ebe husik ona ita ba mundu seluk, foinsa’e presiza la’o tuir sira-nia espiritu da luta hodi kontinua reforsa nasaun Timor-Leste, nune’e bele hambrik metin ba futuru.
“Heroi sira lori duni pensamentu ida ne’ebe mak diak no durativu, eduka foinsa’e sira preserva ba doutrina sira ne’ebe mak ita-nia patriota sira husik ona ita ba mundu seluk, atu ita halo buat ida ne’ebe uluk sira la halo karik, agora oportunidade ba joven sira atu halo diak liu tan hodi hatutan kontribuisaun patriota sira nian, Nia hakotu”.