Pose Ba Estrutura Matebian ! Naimori Deklara “KHUNTO Laiha Na’in, Timoroan Hotu Mak Na’in”.

Imajem : Liderança Sentral Partidu KHUNTO iha postu administrativu Matebian, munisipiu Baucau,16/08/2025

SAPNewsTL, Baucau : Partidu Kmanek Haburas Unidade Nasional Timor Oan (P-KHUNTO) hala’o serimonia tomada de pose ba estrutura postu administrativu Matebian, munisípiu Baucau ho lema “Tempu to’o ona, Hamutuk ita sei bele”.

Dircia Baptista Belo – SAPNewsTL

Konselleiru Partidu KHUNTO José dos Santos Naimori hatete jerasaun foun prontu sai mata dalan no hatutan aman sira luta durante tinan naruk, prontu ho planu no matan mós hodi haree saida mak naroman no nabilan iha rai ida ne’e.

“Partidu KHUNTO nia na’in laiha, nia na’in mak Timor oan no unidade nasionál, dala ruma ema trata dehan beikteen maibé la naok teen ida, dehan matenek liu ne’e mak nia mesak halo tuir nia hakarak”.

“Akontese iha rai ida dezenvolvimentu iha oin rua, ida dezenvolvimentu ba ema hotu-hotu, bele hala’o servisu iha area estadu no dezenvolvimentu ida ba povu hodi hala’o nia moris rasik”. Dehan Konselleiru Partidu KHUNTO José dos Santos Naimori iha postu administrativu Matebian, 16/08/2025.

Naimori Bucar dehan, “Programa partidu KHUNTO karik povu fo fiar, ita bele halo buat di’ak maske partidu keta ketak maibé ita iha hanoin ida de’it atu servi povu”.

KHUNTO iha programa rasik katak hakarak luta ho povu, hamutuk ho joven sira atu labele namkari, “Ita labele ba bosok sira iha tempu kampaña maibe ba futuru, ita prepara no hadia sira oinsá para sira bele sai ema ida ne’ebé di’ak hodi asegura ita-nia mehi durante tinan naruk luta hodi lori nasaun ba oin”.

Timor iha xave importante rua mak rona malu no fiar malu, se rona malu fiar malu nasaun ne’e ba oin maibé la rona malu no la fiar malu maka nasaun ne’e sei la ba oin.

Naimori afirma KHUNTO preparadu hodi kontribui ba estadu, nune’e estadu iha sentidu hodi proteje ita-nia povu.

“Atu halo dezenvolvimentu tenke iha planu tanba povu hakarak dezenvolvimentu, ita bele apoiu sira kada fulan fo osan $41 to’o tinan 1 simu $500 ba ita-nia povu, ne’e mak partidu nia programa”.

KHUNTO iha polítika rasik atu proteje povu tanba ida ne’e forsa husi povu la’ós pesoal ida nian, polítika mós la’os haree ba kór partidu maibé atu kontribui ba povu tomak iha Timor-Leste.

“Ami oferese ami-nia domin ba povu, se povu ne’e sente katak KHUNTO ne’e programa di’ak entaun povu sei hili, la presija obriga povu tenke hili KHUNTO maibé ami sei hato’o ami-nia programa ba povu katak buat ne’ebé di’ak ne’e ita hotu nian la’ós ema ida nian”.Teni nia

Iha fatin hanesan, Presidente Partidu KHUNTO, Armanda Berta dos Santos sublinha KHUNTO hahú husi inisiu to’o agora mezmu hasoru dezafiu oioin maibé firme hodi la’o nafatin to’o ohin loron.

“Partidu KHUNTO iha ninia filozofia rasik mak Tane o rai, ema no lisan ho nia doutrina mak esperansa no karidade tanba ne’e partidu KHUNTO sai hanesan servidor ba povu. Partidu Polítiku hotu mesak di’ak no sai instrumentu ida hodi servi povu”.

Presidente Partidu KHUNTO parabeniza estrutura tomak iha postu administrativu Matebian no Quelecai ne’ebe fo apoia no votu ba KHUNTO iha eleisaun presidensial no parlamentar tinan 2022-2023.

#KHUNTO #Matebian #Naimori #TimorLeste