Ramos Horta : Kontribuisaun Igreja Katólika Hanesan Ai-Rin & Forsa Ba Povu

Imajem : Presidente Repúblika José Manuel Ramos Horta iha Tasi-Tolu, 20/08/2025

SAPNewsTL, Díli – Komemora ezistensia FALINTIL ba dala 50, Presidente Republika (PR) José Ramos Horta, rekoñese Igreja Katólika nia kontribuisaun moral no espirituál hanesan ai-riin no fó forsa ba povu Timor-Leste durante tinan 24 rezisténsia kontra okupasaun Indonézia.

Guilhermino Ramos — SAPNewsTL

Iha diskursu Xefi Estadu José Ramos Horta hateten, kontribuisaun igreja katólika desenvolve papel importante iha tempu rezisténsia, tanba iha púlpitu, sakristia, eskola misionária no sarani sira-nia uma, povu Timor hetan refújiu, seguransa no lian solidariedade.

“Ita rekoñese igreja katólika nia kna’ar inestimavel nu’udar ai-riin morál no espirituál ba ita-nia rezisténsia. Iha tempu dezesperu nian, ema barak hetan refújiu, aten-barani no lian ida hosi igreja, hanesan Saudozu Dom Martinho da Costa Lopes ho nia lian profétika halo nakdoko konxiénsia internasionál, no Dom Carlos Filipe Ximenes Belo, ho nia obra pastorál inspira no proteje jerasaun sira,” Dehan PR Ramos Horta liu husi nia diskursu iha, Tasi-tolu, 20/08/2025.

PR Horta fundamenta, Bispu sira, amululik sira, irmaun no irmã relijioza, no komunidade parókia sira mós loke dalan ba denúnsia violénsia, proteje vítima sira no fó lian forte kona-ba direitus umanus.

“Ida ne’e mak istória ne’ebé ohin ita reafirma, istória sakrifísiu no vitória nian, istória matan-been no dignidade nian, ida-ne’e maka istória kona-ba povu ida ne’ebé hili atu reziste no manán tiha ona”.

Presidente reforça katak kontribuisaun Igreja Katólika sei parte integrante husi istória sakrifísiu no vitória povu Timor-Leste hanesan simbolu dignidade no rezisténsia nian.

Mensajen rekoiñesementu ne’e PR José Ramos Horta hato’o hodi rekoiñese mártires no mate restu sira nia luta, inklui hato’o simbolu rekoiñesementu ba luta igreja katolika durante tempu rezistensia.