Maske Demonstrasaun Nakfila Ba Anarkizmu, Rezulta Ema Kanek & Sunu Karreta Maibe Hetan Rezultadu
Imajem : Karreta estadu ida ne’ebe sunu hosi manifestante inisial DdC, jornalista sira hasai fotografia no videografia kona ba akontesimentu ne’e iha Kaikoli, Dili, 16/09/2025.
SAP News TL, Dili : Manifestasaun ne’ebe hala’o hosi Estudante Universidade Timor-Leste (EUTL) nakfila ba anarkizmu hodi resulta ema na’in sanulu resin lima hetan kanek, karreta estadu ida hetan sunu, karreta PNTL ida rahun no manifestante balun hetan kapturasaun hosi autoridade seguransa durante demonstrasaun iha Dili, Timor-Leste.
Marciana Da Conceição Jurnalis – SAP News
Iha entrevista, Porta Voz Estudante Universidade Timor-Leste (EUTL) José da Costa informa manifestasaun ne’e mosu ema datoluk ne’ebe tuda, nune’e mosu tuda malu no polísia tiru gas lakrimogêneu, ikus mai ema na’in 6 kanek.
“Ohin mosu tuda malu, mais ou menuz ema na’in kanek, ohin lori ona ba ospital ho halo tratamentu, ita-nia asaun pasífiku sei kontinua, ita husu para labele halo anarkismu, labele tuda malu”. Dehan Porta voz EUTL José da Costa ba SAPNews iha Kampus Sentral UNTL, 15/09/2025.
Jose afirma, maske Parlamento Nasional hapara ona sosa karreta ba deputadu sira, maibe kestaun lei pensaun vitalísia no alterasaun ba lei 100 metrus seidauk hapara, tanba ne’e luta sei kontinua to’o hetan resultadu ikus.
“Ami sei resiste, kansela ona sosa karreta, lei pensaun vitalísia no lei 100 metrus seidauk altera, ami sei luta kontinua”. Nia afirma.
Iha sorin seluk, Jornalista SAPNews Sérgio Alves da Costa, hetan tiru hosi PNTL ne’ebe soe gas lakrimogêneu ba manifestante sira hodi kona nia isin no resulta nia oin kanek uituan.
“Ha’u hetan tiru, PNTL nia gas lakrimogêneu kona ha’u nia isin no kona ha’u nia oin hetan kanek uituan, ami na’in rua (Sergio Alves da Costa & Ermelinda Soares) ne’ebe halo live streaming ne’e monu, hafoin ami halai tama ba eskritóriu administração UNTL nian, ha’u-nia kolega jornalista Daniel da Silva ne’ebe hasai foto mós hetan tuda hosi manifestante sira”.
“Ami hanoin katak manifestasaun ne’e bele la’o iha paz no estabilidade, Laiha anarkismu no tuda malu maibe infelizmente mosu tuda malu, ikus mai manifestante balun hetan kanek iha ulun, ain no trauma iha manifestasaun”. Hateten Sérgio Alves
ih parte seluk, Komandu Polisia Nasionál Timor-Leste (PNTL) liuhusi Diresaun Servisu Investigasaun Kriminal (DSIK), identifika joven mane estudante ida husi eskola sekundariu Novel da Paz, deskonfia sunu karreta ida, hafoin envolve iha manifestasaun ne’ebé organiza husi Estudante Universiariu Timor-Leste (EUTL) hasoru Parlamentu Nasional.
Porta Vos Komandu PNTL Superintendente Polisia João dos Reis Belo informa, iha gravasaun video no voise balun sirkula iha rede social WhatsApp, dehan autoridade seguransa naok estudante iha ho naran inisial DdC, ida ne’e informasaun lalos, maibe PNTL ezekuta tarefa servisu hodi bolu sidadaun sira ne’ebé maka tuir aparellu CCTV ho Drone ne’ebé lansa husi autoridade seguransa grava individu se deit mak halo anarkismu iha Manifestasaun.
“Ha’u atu klarifika katak, sidadaun joven estudante mane ida ho inisial Ddc husi eskola eskola sekundariu Novel da Paz, tanba iha relasaun ho aktu krime ne’ebé nia rasik deklara envolve iha kazu sunu mutuk kareta ida iha area UNTL nia oin, entaun ami ba foti nia halo idetifikasaun akompaña direta husi nia advogadu ida,” Dehan Porta Vos Komandu PNTL iha Komferensia Imprensa iha kuartel Jeral PNTL Caicoli Sexta-Feira
Porta Vos Komandu PNTL afirma, PNTL ezekuta servisu ba foti iha nia eskola, hafoin halo tiha identifikasaun haruka fila ba uma, tanba ne’e sidadaun sira ne’ebé envolve iha manifestasaun halo anarkismu sunu karreta ida ne’e sei foti halo idetifikasaun, tanba ne’e ekipa autoridade seguransa dadaun ne’e kontinua buka tuir sidadaun sira.
“Sidadaun sira ne’ebé envole iha manifestasaun halo anarkismu sunu mutuk karreta no tuda rahun karreta to’o agora halo ona ideitifikasaun ema nain sanulu resin tolu hotu ita Haruka fila ba uma, depois hein prosesu tuir ita sei buka tuir tan sira seluk ne’ebé envole iha manifestasaun halo anarkismu,”nia sublinha.
Durante manifestasaun loron tolu husi Estudantes Universitarius Timor-Leste (EUTL) ne’ebe realiza iha resintu Parlamentu Nasional nia oin, rezulta membru Polisia Nasional Timor-Leste (PNTL) na’in rua husi Unidade Espesial Polisia (UEP) hetan tuda husi ema deskuiñesidu rezulta kanek iha parte Ain no parte hasan no manifestante na’in sanulu resin lima (15) hetan kanek.
Wainhira polísia sira ne’ebe presente iha fatin tiru gás lakrimogêneu, estudante sira halai namkari, barak monu iha fatin, hetan kanek, barak sente trauma no tanis. Iha manifestasaun ne’e, Karreta Polícia Nasional Timor-Leste (PNTL) nia karreta ida rahun, karreta estadu ida hetan sunu, no karreta diplomata Uniaun Europeia nian ida nia vidru rahun.
EUTL nia demonstrasaun ne’ebe la’o durante loron 3 (15-17/09/2025) hodi kontra Parlamentu Nasional ne’e hetan ona resposta pozitiva katak PN kansela sosa karreta, halo revogasaun ba lei pensaun vitalísia no dekretu lei 1/2006 kona ba liberdade reunião no manifestasaun liliu iha klauzula ida kona-ba 100 metrus dook husi edifísiu públiku no promete halo investimentu ba setor produtivu sira.