Aniceto Konsidera Manifestasaun Hatutan Proposta FRETILIN ! Agradese Ba Manifestante Sira
Imajem : Estudante hala’o manifestasaun iha resintu Kampus UNTL Dili, 15/09/2025. Foto : Daniel da Silva
SAP News TL, Díli : Manifestasaun ne’ebe Estudante Universitariu Timor-Leste (EUTL) oraniza hodi husu hapara sosa karreta ba deputadu sira, Presidente Bankada Frente Revolusionariu de Timor-Leste Independente (FRETILIN), Aniceto Guterres deklara, nia parte agradese ba manifestante sira tanba hatutan proposta FRETILIN vota kontra akizisaun sosa viatura 65 ba deputadu sira.
“Seidauk to’o agora, sira muda ona sira nia pozisaun. Ida ne’e diak no ida ne’e mak FRETILIN espera desde uluk, lolos, FRETILIN hanesan partidu mak halo proposta atu hasai osan sosa karreta nian 4 milhãun no osan viajen ba estranjeiru”. Dehan Deputadu Aniceto Guterres, ba Jornalista sira iha resintu PN, Segundu (15/09/2025)
Deputadu ne’e dehan, durante bankada sira aprezenta proposta iha plenaria, pozisaun bankada deside hodi vota kontra proposta sosa karreta ba deputadu sira, maibé bankada governu vota kontra proposta ne’ebe FRETILIN hato’o.
“Ami nia proposta sira mak vota kontra, ne’e mak ita-boot sira akompaña, Deputadu Duarte Nunes bainhira nia koalia, espresaun ne’e hato’o katak sira hakarak kontra ami-nia proposta,” Dehan Aniceto.
Nia hatutan, razaun ida mak FRETILIN vota kontra Orsamentu Jeral Estadu (OJE) iha tinan 2024 tanba proposta hirak ne’ebe bankada FRETILIN hato’o la liu hotu iha diskusaun tanba rezeita husi deputadu sira ne’ebe reprezenta bankada governu.
“Pozisaun FRETILIN klaru ona desde uluk katak ami hakarak hasai osan sosa karreta, tanba povu iha nesessidade seluk ne’ebé presija atende, Deputadu sira iha previlégiu barak ona, tanba ne’e mak la presija sosa karreta, maibé ami hanoin hanesan ne’e no ami halo proposta, ami menoria, ami-nia proposta la pasa no sira rasik mak vota kontra,” Hatete nia.
Imajem : Presidente Bankada FRETILIN Aniceto Guterres
Aniceto hatutan, manifestasaun ohin loron hatudu mudansa pozisaun ne’ebé konsidera diak, tanba imediatamente hetan resposta husi deputadu sira hodi kansela politika Parlamentu Nasionál kona-ba sosa viatura 65 ba deputadu.
“Ha’u nu’udar xefe bankada agradese liu ba manifestante sira, ha’u ladun kontente tanba ohin iha deskontroladu oituan, maibé tanba ema barak dala ruma iha momentu ida lakon kontrolu, entaun asaun refere halo mudansa diak”.
Nia explika tan katak votu FRETILIN kontra iha OGE liuba mós justifikavel, tanba buat hotu iha lei, regalia no benefísiu bainhira atu diminui tenke tuir lei, hanesan mós Orsamentu Jeral Estadu.
“Orsamentu ne’e presija ezekuta, maibé seidauk ezekuta, manifestasaun mós tama hanesan oportunidade hodi hato’o ita-nia hanoin, ha’u rona katak karreta prosesu lao hela, ha’u-nia informasaun husi fonte kredível balu dehan karreta iha ona, maibé hau la hatene, se kansela ka lae,” Aniceto Salienta.
Entretantu, deklarasaun ne’e Presidente Bankada FRETILIN hato’o, ba jornalista sira, hafoin Estudante Universitariu Timor-Leste manifesta sira-nia pozisaun hodi halo asaun pasífika protesta kontra Parlamentu Nasionál (PN).
Tuir reprezentante Bankada Governu Deputadu Patrocínio Fernandes hateten, Bancada CNRT, PD no KHUNTO konsiente katak desizaun sosa kareta la reprezenta preokupasaun públiku nian, haree de’it ba ezijénsia deputados 65 no difikuldades ne’ebé sekretariadu PN enfrenta nu’udar aproveitamentu polítiku hodi hamosu instabilidade.
“Ohin, Bancada CNRT, Bancada PD no Bancada KHUNTO hakarak hala’o konferensia Imprensa ida-ne’e atu esklarese ba públiku tomak kona-ba pozisaun Bancada Governu nian deside hodi husu ba Parlamentu Nasionál atu kansela prosesu akizasaun karreta” Dehan Deputadu CNRT Patriosino, Iha Parlamentu Nasional, Segundu (15/09/2025)
Vise-Xefe Bankada Partidu Congresso Nacional da Reconstrução Timorense (CNRT) ne’e fundamenta, Bankada Governu halo análize ba polémika sosa kareta, indika katak própriu deputados balun direta no indireta esplora situasaun ne’e nu’udar aproveitamentu ida ba sira nia interese polítika partidária no grupu
Deklarasaun ne’ebe hato’o husi Bankada Governu konsidera hanesan resposta politika ba voz povu, ne’ebé hatudu atravez manifestasaun sira hodi deside resposta ba prekupasaun ne’ebe povu reklama iha loron ohin
Koordenador Estudante Universitariu Timor-Leste (EUTL) Natalício Nunes komfirma katak iha dialogu ho Presidente Parlamentu Nasional deside kansela imediatamenti prosesu sosa kareta ba deputadu sira, no promete kontinua diskute alterasaun ba Lei manifestasaun no Lei Pensaun Vitalísia antes lori ba plenária.
“Ami representa estudante sira halo dialogu ho Presidente Parlamentu Nasional. Objetivu mak atu bele deside desizaun sira tuir ezizensia EUTL, no sira deklara imediata katak hapara prosesu ezekusaun sosa karreta 65″.
Natalício fundamenta, Primeiru, EUTL husu atu kansela sosa kareta Prado ka hapara prosesu sosa kareta ba deputadu sira, Iha rezultadu dialogu ohin, sira deside kansela imediatamente.
“Segundu, ami husu kona-ba alterasaun ba Lei Manifestasaun no Liberdade Manifestasaun, prosesu sei kontinua iha Parlamentu Nasional, Ami hein desizaun final liu husi rezolusaun ne’ebé sei hato’o. Ami sei kontinua akompaña, no karik rezolusaun la afavor estudante sira nia ezizensia, ami sei kontinua kontra”
Terseru, kona-ba alterasaun ba Lei Pensaun Mensal Vitalísia, iha dialogu ne’e Presidente Parlamentu Nasional hamutuk ho bankada PD, KHUNTO no CNRT hateten katak semana ida ne’e sei iha rezolusaun, sei lori ba plenária no sei fo sai ba públiku.
Parlamentu Nasionál deside ofisialmente hapara prosesu akizisaun sosa karreta marka Prado Sport unidade 65 ba membru parlamentu VI lezislatura liu husi diskusaun iha Plenaria Parlamentu Nasional, bankada sira konkorda aprova ona proposta rezolusaun númeru N°65/2025, passa ho konsensu komun hodi kansela akizisaun ba viaturas unidade 65 ba deputadu/a sira iha uma fukun PN.