Sai Eroi Halakon LPV, PNTL Kongratula EUTL
Imajem : Manifestasaun loron datoluk, hafoin konkista vitória hasoru Parlamentu Nasional iha Dili, 17/09/2025
SAPNewsTL, Dili : Estudante Universidade Timor-Leste (EUTL) nia manifestasaun hasoru Parlamento Nasional kona-ba revogasaun Lei Pensaun Mensal Vitalísia, no dekretu lei número 1/2006 kona ba liberdade reuniaun no manifestasaun liliu altera distánsia 100 metrus dook hosi edifício público, finalmente hetan konkordansia entre EUTL & PN liu hosi asina akordu.
Manifestasaun ne’ebe organiza hosi EUTL ne’e envolve estudante barak husi UNITAL, UNTL, UNPAZ, IOB, UNDIL no kamada sosial sira kontinua halibur iha resintu kampus UNTL hodi manifesta sira-nia preocupação no kritika parlamentu nasional.
Porta voz EUTL José da Costa husu ba manifestasaun sira hodi mantein damen, amizade no evita anarkismu, nune’e bele foku ba kontra Parlamentu Nasional kona ba revoga lei pensaun mensal vitalísia, altera dekretu lei númeru 1/2006 kona ba liberdade reuniaun no manifestasaun liliu kona ba distânsia 100 metrus no investe makas iha setor save sira.
“Ita-nia manifestasaun kontinua la’o, ita hotu tenki asegura paz, kontrola an no labele halo anarkismu, atu ita bele fokus ba kontra PN revoga lei pensaun vitalísia no distância 100 metros”.
“Nune’e bele tau osan makaas ba setor produtu sira hanesan edukasaun, saúde, agricultura, infra-estrutura, turismo no setor estratégiku sira seluk, ohin ita manan ona, lei pensaun mensal vitalísia halo ona akordu hodi halo lakon”. Hateten Porta voz EUTL José da Costa iha Kampus Sentral UNTL, 17/09/2025
José hateten, vitória ne’ebe manifestante sira luta finalmente konkistadu liu hosi akordu entre EUTL & PN, vitória ne’e mai hosi konkista, ema kanek, ema krítiku ho argumentativu maka bele konkista justisa, prosperidade no igualdade.
“Ita nia luta, ita manan ona, Parlamentu Nasional kona ba revoga lei pensaun mensal vitalísia, altera dekretu lei númeru 1/2006 kona ba liberdade reuniaun no manifestasaun liliu kona ba distânsia 100 metrus no investe makas iha setor save sira, ita mana ona”.
“Vitória ne’e ema la fo hosi bandeiza, laos mós hetan hosi sira-nia laran diak, ita manan ona, nune’e sira bele investe ba setor produtu sira hanesan edukasaun, saúde, agrikultura, infra-estrutura, turismu no setor estratégiku sira seluk, ohin ita manan ona, lei pensaun mensal vitalísia halo ona akordu hodi halo lakon”. Hateten Porta voz EUTL
Imajem : Manifestante EUTL sunu roda, hatan hasoru Membru PNTL kona ba la autoriza fatin hodi resulta ba anarkismu iha arena manifestaun, Dili, 16/09/2025. Foto : Daniel da Silva
Segundu Komandante Jerál Polisia Nasional Timor-Leste (PNTL) Komisariu Polisia Pedro Belo apresia manifestante hotu tanba konsege halo dialogu hodi hetan duni vitória, vitória istóriku ne’ebe konkista liu hosi luta no matenek juventude Timor-Leste nian.
“Estudante sira hahú manifestasaun husi segunda to’o kuarta-feira, alin sira hetan duni vitória, vitória ida ne’e, uluk kedas imi-nia maun sira luta maibe laiha final, maibe ohin hetan duni vitória, vitória ne’e ema hotu nian, vitória istóriku”. Hateten Segundu Komandante Jerál Polisia Nasional Timor-Leste (PNTL) Komisariu Polisia Pedro Belo iha kampus Sentral UNTL Dili,17/07/2025
Pedro Belo hatutan, “Imi kontrola emosaun maske gás lacrimogêneo kona ita-boot sira, média no polísia sira maibe imi hatudu matenek, dialogu mak úniku dalan hodi resolve problema hothotu”.
“Ita fo agradesimentu ba deputadu sira ne’ebe loke odamatan ba ita hodi halo dialogu hodi ita hetan vitória, timoroan tenki loke odamatan ba malu hodi halo diálogu hodi resolve problema”.
Pedro mós husu ba estudante sira hodi servisu hamutuk, hatudu dixiplina, hakribi krimi no violénsia hodi halo deit ezijensia no halo dialogu, nune’e bele resolve problema ne’ebe presiza atu hetan solusaun.
“Hakribi violênsia, hatudu dixiplina nu’udar Juventude Timor-Leste ne’ebe matenek, ita la halo hanesan nasaun sira seluk halo, parabéns ba imi hotu no parabéns ba porta voz sira”.
Universitariu Timor-Leste (EUTL) nia manifestasaun hasoru Parlamento Nasional kona ba revoga Lei Pensaun Vitalísia, no dekretu lei número 1/2006 kona ba liberdade reuniaun no manifestasaun, liliu altera distánsia 100 metrus dook hosi edifício público finalmente halakon liu hosi akordu entre EUTL & PN hodi prepara aprovasaun iha plenária iha loron 25 Setembru 2025.
Manifestasaun ne’ebe la’o durante loron tolu, resulta manifestante sira sanulu resin lima (15) hetan kanek, karreta estadu ida hetan sunu, karreta PNTL ida vidru rahun, karreta diplomata União Europeia nian ida vidru rahun inklui manifestante no membru PNTL balun hetan kanek.