PR Ramos : “Presença PM Ibrahim Fortifika Amizade Entre TL & Malásia”.
Imagem : Presidente República Jose Ramos Horta & Primeiru Ministru Malásia Dato’ Seri Anwar Ibrahim iha Palasiu Presidente Nicolau Lobato Dili, 23/09/2025. Foto : Média GPR
SAP News TL, Díli : Prezidente Republika (PR) José Ramos-Horta konsidera, vizita ofisiál Primeiru-Ministru Malázia, Dato’ Seri Anwar Ibrahim, hanesan reafirmasaun forte ba amizade profunda no duradoura entre Timor-Leste no Malázia.
Xefi Estadu Horta subliña katak, Malázia nia apoiu ba Timor-Leste hahu iha momentu krítiku sira, inklui antes restaurasaun independénsia, krize polítika 2006, no advokasia ba adezaun Timor-Leste ba ASEAN ne’ebe sei akontese iha fulan outubru tinan ne’e.
“Ha’u haksolok tebes mak ha’u hato’o benvindu ba ha’u-nia belun diak, Primeiru-Ministru Dato’ Seri Anwar Ibrahim, mai Timor-Leste. Ninia vizita hanesan reafirmasaun forte ida ba amizade profunda no duradoura entre ita-nia nasaun rua ligasaun ida ne’ebé harii iha solidariedade no mantén ho valor sira ne’ebé ita fahe,” Dehan PR Ramos iha Palasiu Prezidensial Aitarak-laran, Tersa-feira, (23/09/2025)
Prezidente Repúblika fundamenta, relasaun bilaterál entre Timor-Leste no Malázia hahu kedas iha momentu kritiku, tanba ne’e Malázia kontinua apoiu preparasaun Timor-Leste atu sai membru plenu ASEAN, liu husi ideolojia no politika.
“Ita-nia relasaun ne’e iha kompromisu komun ba demokrasia, justisa, no respeitu mútuo. Apóiu firmi Malázia nian ne’e instrumentál durante momentu krítiku sira iha ita-nia istória, iha períodu antes restaurasaun ita-nia independénsia, durante krize polítika 2006, no nia advokasia la para ba Timor-Leste nia membru ASEAN”.
Prezidente Ramos Horta hala’o enkontru bilaterál ho Primeiru-Ministru Dato’ Seri Anwar Ibrahim, reafirma amizade kmanek entre Timor-Leste no Malázia no sira-nia kompromisu ba Ázia Sudeste ida ne’ebé pás no prósperu.
Enkuantu Timor-Leste prepara an atu sai membru ASEAN ba da-11 iha Cimeira ASEAN ba da-47 iha fulan-outubru tinan 2025, parte rua sei kontinua koordenasaun besik ho ASEAN hodi atinje roteiru sira seluk ne’ebé falta iha roadmap.
𝐏𝐨𝐧𝐭𝐮 𝐢𝐦𝐩𝐨𝐫𝐭𝐚𝐧𝐭𝐞 𝐤𝐚 𝐀́𝐫𝐞𝐚 𝐗𝐚𝐯𝐞 𝐬𝐢𝐫𝐚 𝐧𝐞’𝐞𝐛𝐞 𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮 𝐌𝐚𝐥𝐚́𝐳𝐢𝐚 𝐬𝐞𝐢 𝐝𝐢𝐬𝐤𝐮𝐭𝐞 𝐡𝐨 𝐨𝐫𝐠𝐚𝐮𝐧 𝐬𝐨𝐛𝐞𝐫𝐚𝐧𝐮 𝐬𝐢𝐫𝐚 𝐝𝐮𝐫𝐚𝐧𝐭𝐞 𝐞𝐬𝐭𝐚𝐝𝐢𝐚 𝐢𝐡𝐚 𝐓𝐢𝐦𝐨𝐫-𝐋𝐞𝐬𝐭𝐞:
- 𝐀𝐝𝐞𝐳𝐚𝐮𝐧 𝐀𝐒𝐄𝐀𝐍: Timor Leste sei kontinua kordenasaun besik ho Malázia no ASEAN atu kompleta roteiru sira seluk ne’ebé falta iha roadmap atu sai membru tomak antes adezaun ne’ebé planeia ona iha simeira ASEAN iha fulan Outubru tinan 2025.
- 𝐊𝐨𝐦𝐞́𝐫𝐬𝐢𝐮 𝐧𝐨 𝐈𝐧𝐯𝐞𝐬𝐭𝐢𝐦𝐞𝐧𝐭𝐮: Parte rua ne’e simu ho laran-haksolok interese Malázia nian iha ekonomia Timor-Leste nian no konkorda atu fasilita investimentu ne’ebé fó benefísiu ba malu, liuliu iha agronegósiu, turizmu, servisu dijitál, no enerjia renovável.
- 𝐄𝐝𝐮𝐤𝐚𝐬𝐚𝐮𝐧 𝐧𝐨 𝐀𝐛𝐢𝐥𝐢𝐝𝐚𝐝𝐞: Lider sira kompromete atu habelar oportunidade ba estudante no ofisiál timoroan sira atu hetan benefísiu husi formasaun tékniku no profisionál, bolsa estudu, no interkámbiu ho instituisaun Malazia sira.
- 𝐊𝐨𝐧𝐞𝐭𝐢𝐯𝐢𝐝𝐚𝐝𝐞 𝐧𝐨 𝐅𝐚𝐬𝐢𝐥𝐢𝐝𝐚𝐝𝐞 𝐇𝐚𝐥𝐨 𝐍𝐞𝐠𝐨𝐬𝐢𝐮: Nasaun rua ne’e sei servisu atu hadia liu tan konektividade aéreu no marítima, fasilitasaun komérsiu, no parseria hodi hametin ligasaun entra povu no komérsiu.
Tuir agenda, Iha loron ikus vizita nian, Primeiru-Ministru Dato’ Seri Anwar Ibrahim mós sei hato’o diskursu prinsipál Palestra Prezidensiál 2025 Série IV, iha loron 24 fulan-Setembru tinan 2025, ho títulu “ASEAN no Papél Timor-Leste nian.”
Aleinde ne’e, Prezidente Ramos Horta sei kondekora Primeiru-Ministru Dato’ Seri Anwar Ibrahim ho Grande Colar da Ordem de Timor-Leste, nu’udar rekoñesimentu ba ninia amizade kleur ona ho Timor-Leste no mós apoiu ba ita-nia dezenvolvimentu nasionál no integrasaun rejionál nian.
Entretantu, estadía ofisiál Primeiru-Ministru Malázia Honorável Dato Seri Anwar Ibrahim, iha Timor-Leste dura ba loron rua hahu loron 23 to’o loron 24 fulan setembru tinan 2025, hafoin sei fila hikas ba nasaun Malázia iha loron aban iha oras tuku tolu liu minutu tolu nulu 15:30 OTL lokraik.
𝐅𝐨𝐭𝐨 𝐌𝐞́𝐝𝐢𝐚 𝐏𝐑
Malasia TimorLeste Dili XananaGusmão #AnwarIbrahim #JoseRamosHorta #Asean