PM Malásia Apresia Deputadu Sira Tau Aas Interese Komun
Imajem : Primeiru Ministru Malásia Dato Seri Anwar Ibrahim hamutuk ho Presidente Parlamentu Nasionál Maria Fernanda Lay iha Uma Fukun PN Dili, 24/09/2025
SAPNewsTL, Dili : Parlamentu Nasionál realiza sesaun plenária ba vizita ofisiál Primeiru Ministru (PM) Malázia, Iha diskursu PM Malásia Dato Seri Anwar Ibrahim apresia deputadu/a sira tanba maske defende polítika diferente maibe unidu defende interesse komun.
Prezidente Parlamentu Nasionál Fernanda Lay hateten, nia parte sente orgullu ho vizita Primeiru-Ministru Malázia iha Parlamentu Nasionál ne’ebé hatudu demokrasia, rezisténsia nia espíritu no kompromisu ne’ebé inabalável ho justisa.
“Orgulho boot tebes ne’ebé labele subar katak Parlamentu ida ne’e simu Primeiru Ministru, Anwar bin Ibrahim, ne’ebé hanesan estadista ida ne’ebé hatudu demokrasia nia espíritu, rezistênsia nia espíritu no kompromisu ne’ebé inabalável ho justisa”. Dehan Prezidente Parlamentu Nasionál Fernanda Lay iha sala plenária PN, Kuarta-Feira, 24/09/2025.
Prezidente PN konsidera Malázia sai parseiru no belun diak ho nia apoiu sira ba Timor-Leste nu’udar nasaun dezenvolvimentu hanesan joven demokrasia.
“Malázia mak amigu no parseiru ne’ebé sempre diak iha nia apoia ba edukasaun, iha asisténsia médika no dezenvolvimentu kapasidade nian, no suporta hotu-hotu ne’e importante tebes ba ami-nia dezenvolvimentu hanesan joven demokrasia”.
Primeiru-Ministru Malázia Dato Seri Anwar Ibrahim apresia ho Timor-Leste ne’ebé esforsu atu prense rekizitu hotu hodi adere ba ASEAN no sai fraternidade iha ASEAN.
“Ha’u agredese ba Timor-Leste nia akollamentu no apresia esforsu ne’ebé mak Timor-Leste halo hodi preense rekizitu sira ba membru ASEAN nian”. Dehan Primeiru-Ministru Malázia Dato Seri Anwar Ibrahim liu husi nia diskursu.
Nia mos apresia ho Parlamentu Nasionál iha ne’ebé partidu no deputadu sira defende politika lahanesan maibé sempre unidu hodi defende interese komun.
“Apresia mos demokrasia ne’ebé la’o iha Timor-Leste, espesialmente iha Parlamentu Nasional ne’ebé hatudu katak mesmu partidu no deputadu sira defende politika diferente, maibe sempre unidu hodi defende interese komun. Ha’u afirma katak Malázia kontinua konsistente apoiu Timor-Leste nia adezaun ba ASEAN”.
Ibrahim reafirma katak ASEAN aposta ba inkluzividade no sustentabilidade ne’ebe foka mós ba konektividade liliu iha integensia artifisial no tranformasaun digital.
“Ita tenki representa aspirasaun povu nian, dignidade mane no feto nian iha mundu, ha’u respeitu imi-nia lian, ASEAN aposta ba inkluzividade, sustentabilidade no konektividade iha tranformasaun digital no artifisial intelegensia, proteze ita-nia povu no proteze ita-nia valor sira”. Anwar Ibrahim sublinha