Inséndiu Ermera, Família Halot Ona Matebian Na’in 5, Labarik 1 Kanek Grave
Imajem : Família halot matebian na’in 5 ne’ebe mate iha Letefoho, Ermera, 28/09/2025.
SAPNewsTL, Ermera : Família halot ona matebian na’in 5 hanesan Franjinha de Araujo Gomes ne’ebe mate ho kondisaun grávida, Alberto Soares Paiva (Laen) no nia oan feto Zara de Araujo Soares Paiva iha postu administrativu Letefoho, munisipiu Ermera.
𝐌𝐚𝐫𝐜𝐢𝐚𝐧𝐚 𝐝𝐚 𝐂𝐨𝐧𝐜𝐞𝐢𝐜𝐚𝐨 – Mídia Sapnews
Tuir informasaun ne’ebe Mídia Sapnews asesu liu hosi fontes kredivel, Bosco dos Santos informa katak inséndiu ne’e mosu iha sexta-feira kalan (26/09/2025), akontesimentu ne’e rezulta inan ho naran Franjinha de Araujo Gomes ne’ebe iha kondisaun grávida mate fatin.
Enkuantu, Alberto Soares Paiva (Laen) no nia oan feto Zara de Araujo Soares Paiva no vizinu nia oan, alin mane Zenivio hakotu iis iha Hospital Nasional Guido Valadares (HNGV) Dili, iha loron 27 Setembru 2025.
Inséndiu ne’e akontese tanba kauza hosi sunu lilin iha uma laran, ikus mai halo gazolina nakfera no rezulta ahi-han sira iha uma laran, iha aldeia Lokolai/Duhoho, suku Haupo, postu administrativu Letefoho, munisipiu Ermera.
“Ahi-han subriñu ne’e ho nia fen no oan, bin Franjinha de Araujo Gomes ne’e mate fatin ho kondisaun isin-rua, nia laen Alberto Soares Paiva ho alin nain tolu transporta kedas ba Hospital Letefoho-Gleno, tuir mai lori ba HNGV, orseik nia laen ne’e ho labarik na’in rua mate tan”. Informa fontes kredivel, Bosco dos Santos ba SAPNews iha Ermera, 28/09/2025
To’o oras ne’e, vítima na’in lima ne’ebe sofre inséndiu ne’e hela labarik ida mak sei moris no hala’o hela tratamentu iha Ospital Nasional Guido Valadares Dili tanba sofre kanek grave.
Inséndiu ne’e rezulta ema na’in lima inklui bebe ida ne’ebe sei iha inan nia kabun mate dala ida ho nia inan iha fatin akontesimentu.
Hafoin mate isin lori hosi Dili ba to’o Letefoho, família sira hamutuk halot ona matebian Franjinha de Araujo Gomes ne’ebe mate ho kondisaun grávida, Alberto Soares Paiva (Laen) no nia oan feto Zara de Araujo Soares Paiva ba kuak ida iha nia rai moris fatin.