Susesu Revoga LPV, EUTL Selebra Ho Marsa Pasífika

Imajem : EUTL hala’o marsa pasífika selebra vitória halakon lei pensaun vitalísia

SAPNewsTL, Díli : Hafoin komferénsia imprensa, Estudante Universitariu Timor-Leste (EUTL) hala’o marsa pasífiku husi resintu Quartel Jeral Polisia Nasional Timor-Leste (PNTL) Kaikoli to’o iha momentu Francisco Xavier merkadu lama, hodi husu Prezidente Republika, José Ramos Horta, atu promulga projetu lei revogasaun lei pensaun mensál vitalísia.

Tuir observasaun Mídia SAPNews,TL iha resintu Kuartel PNTL Kaikoli nia oin, estudante sira organiza malu koopera ho parte operasaun PNTL hodi hahú marsa husi kuartel nia oin to’o iha merkadu lama, hafoin fila fali ba kampus sentral Universidade Nasional Timor Loros’e (UNTL).

Atividade pawai ne’e akumula masa barak husi Estudante Universitariu Timor-Leste (EUTL), maibé organizadu tebes tanba estudante koopera ho parte Polisia Nasional Timor-Leste PNTL, Sexta-feira, (26/09/2025)

Rekorda fali katak, resultadu votasaun kona ba lei pensaun vitalísia hosi Parlamentu Nasional ohin, hatudu 62 votu afavor, kontra zero no abstensaun zero iha final global, no hein submete ba Prezidenti Republika atu hetan promulgasaun.

Tuir observasaun, bainhira EUTL hahu hala’o komboiu iha oras tuku tolu resin, Komandu Jeral PNTL orienta kedas membru Polisia Nasional Timor-Leste balun ba iha Parlamentu Nasional PN hodi fó seguransa ba edifisiu PN.