Selebra Tinan 13, Telkomcel Halo Asaun Karidade Iha Baucau, Likisa & Dili
Imajem : Telkomsel halo asaun karidade ba komunidade vulnerabilidade iha munisipiu Baucau, 19/09/2025
SAPNewsTL, Baucau : Relasiona ho ezistensia Telkomcel ba dala-13 iha Timor-Leste, Telkomcel realiza programa Corporate Social Responsability (sigla Inglés, CSR Telkomcel) halo asaun karidade ba komunidade uma kain haat iha munisípiu Baucau.
Bazeia ba ezistensia telekomcel iha Timor-Leste ne’ebé halo tinan ba-13, ekipa Telkomcel hala’o asaun karidade la barak maibe ho fuan no laran fahe nesesidade bazika ba ema sira ne’ebé presiza, tuir moto ne’ebé sira iha katak “tulun malu, servi ho domin.
“Ami la haree ba nia montante maibe haree ba ami-nia fuan ho familia unidade, ami iha nesesidade uituan hodi fahe ba inan, aman, maun no alin ne’ebé kbiit laek iha munisípiu Baucau no ami identifika ona fatin haat hanesan Osso-Ua, Loidua, Gariwai no Una-aAna Ulo”. Dehan Chefe Tellomcel Moises Emor Boavida, iha Osso-Ua Baucau Xesta-Feira, 19/09/2025
“Nesesidade bazika ne’ebé ami apoiu mak hanesan mina, manu-tolun, foos, susuben ituan hodi oferese hela familia kbiit laek atu bele sustenta loron rua ka tolu ba nia familia”. Nia subliña.
Nia afirma, sira identifika rasik familia ne’ebé presiza tulun iha ne’ebe servisu hamutuk ho autoridade lokal no Ministériu Solidariedade Sosiál no Inkluzaun.
“Familia sira ne’e ami rasik maka identifika no servisu hamutuk ho parte autoridade lokal sira no ami moos husu informasaun liu hosi Ministeriu Solidariedade Sosiál hodi haree ema ne’ebé presiza loos tulun ba nesesidade loron ida ka rua nian”. Dehan nia.
Moises Emor Boavida akresenta, familia ne’ebé sira apoiu nesesidade bazika, familia ne’e moos presiza tulun husi parte seluk tanba haree ba kondisaun uma ne’ebé la diak.
“Familia iha Osso-Ua hanesan ita hotu hare’e pai no mae ne’e idade loos ona hamutuk ho nia oan no ita haree kondisaun uma ne’ebé ladiak ne’ebé presiza moos tulun, laos husi ami deit, nune’e ami husu ba parte seluk hodi bele ajuda karik iha fuan no laran bele ajuda pai ho mae no moos ba ema sira ne’ebé presiza ita nia tulun”. Nia husu.
Iha fatin hanesan, Delegadu Osso-Ua Sebastião Belo, sente kontente no agradese ba telekomcel nia apoiu. Maibe nia moos husu atu telekomcel iha tinan oin mai tan bele ajuda kbiit laek sira iha sira-nia fatin refere.
“Ha’u sente kontente no agradese ba telekomcel ne’ebe ajuda ona familia ida ne’e, ha’u husu karik bele telekomcel nia ajuda ne’e la to’o deit iha familia ida ne’e, tanba iha fatin ne’e kbiit laek barak”.
Komunidade Virgina da Costa sente kontente no agradese ba telekomcel tanba apoiu ona nesesidade bazika ne’ebé bele ajuda sira iha fulan ida nia laran.
“Ami nia moris mak hanesan ne’e, ha’u husu obrigada no agradese barak ba Telkomcel ne’ebe oferese ona nesesidade bazika, hanesan manu-tolun, foos, supermie no sei iha tan, tanba ida ne’e bele ajuda ona ami ba loron sorin no bele to’o fulan”.
Entretantu, programa Corporate Social Responsability Telkomcel hala’o asaun karidade ba uma kain haat iha munisípiu Baucau inklui ema ho difisiensia nain 4 iha aldeia Loidua, Suku Buibau Postu Baukau vila. Asaun Karidade ne’e Telekomcel halao iha munisípiu Baucau, Liquiça no Dili iha tinan 2025.