TL Nia Adezaun Ba ASEAN Sai Orgullu Nasionál
Imagem : Populasaun sira simu Presidente Repúblika José Ramos Horta, hafoin partisipa adezaun Timor-Leste ba ASEAN iha Malásia. Dili, 29/10/2025.
SAP News, Díli : Hafoin partisipa simeira ASEAN nian ba dala 47° no adezaun Timor-Leste ba ASEAN, Presidente Republika José Manuel Ramos Horta fila hikas mai Díli, populasaun sira simu ho laran-ksolok no halo komboiu husi Comoro to’o Aitarak-Laran.
Daniel da Silva – Mídia Sapnews
Wainhira Presidente Republika José Manuel Ramos Horta to’o aeroportu internasional Nicolau Lobato simu direta hosi Primeiru Ministru Interinu Mariano Assanami Sabino hamutuk ho membru governu sira.
Tuir mai, Presidente Republika mós halo konferensia imprensa hodi esklarese ba povu kona ba admisaun Timor-Leste ba ASEAN no apresia entidade hotu ne’ebe kontribui ba prosesu adezaun ba ASEAN liliu Primeiru Ministru Kay Rala Xanana Gusmão.
Durante komboiu no akompanha Presidente Republika hosi aeroportu Comoro to’o Palácio Presidencial Nicolau Lobato, iha luron ninin labarik barak, estudante barak no populasaun sira ho laran ksolok hodi hakilar “viva Timor-Leste, Viva José Ramos Horta, Viva Timor-Leste”.
Populasaun sira ne’ebe hamrik iha dalan ninin, uza kamiza ” Together We Rise”, kaer bandeira ASEAN, bandeira Timor-Leste, Indonésia, Brunei, Laos, Malásia, Tailândia, Kambodia, Singapura, Filipina, Vietname no Myanmar hodi hakilar, haklalak no haksolok simu Presidente Republika José Manuel Ramos Horta.
Wainhira to’o iha Palácio Presidencial Nicolau Lobato, ekipa resepsaun simu ho hananu lia dadolin tuir kultura Timor-Leste nian.
Lembra fali katak, eventu importante ne’ebe Presidente Republika José Manuel Ramos Horta partisipa maka Asinatura hosi Deklarasaun kona-ba Admisaun Timor-Leste nian ba ASEAN iha loron 26 Outubru 2025 inklui enkontru importante sira selukseluk hosi loron 26-28 Outubro 2025.
Serimónia Asinatura hosi Instrumentu Adezaun ba Tratadu Amizade no Kooperasaun iha Sudeste Aziátiku (TAC) hosi Finlándia, Serimónia Asinatura hosi Protokolu Alterasaun Daruak hosi Komérsiu ASEAN nian Akordu (ATIGA), Simeira Líder sira Parseria Ekonómika Komprensivu Rejionál (RCEP) ba dala 5 no mós Serimónia Aprezentasaun Prémiu ASEAN.
Série enkontru nivel aas nian ne’e fornese oportunidade importante hodi halo balansu ba progresu ASEAN nian, estabelese diresaun sira iha futuru no reafirma kompromisu ASEAN nian ba pás rejionál, estabilidade, seguransa no dezenvolvimentu sustentável no inkluzivu.
Delegasaun ofisial hosi Timor-Leste mak hanesan Presidente Republika José Manuel Ramos Horta, Primeiru Ministru Kay Rala Xanana Gusmão, Vise Primeiru Ministru Francisco Kalbuadi Lay, Ministru Negosius Estranjeirus no Kooperasaun Bendito Freitas no Vise Ministra Asuntu ASEAN Milena Maria Da Costa Rangel, Ministru Transporte no Telecomunicações Miguel Manetelo, Sekretariu Estadu Komunikasaun Sosial Expedito Dias Ximenes, Vise Ministru Asuntu Parlamentares Adérito Hugo da Costa no Xefe Bankada CNRT, FRETILIN, PD, KHUNTO & PLP.