Kumpri Programa Dezenvolvimentu & Hametin Damen Hodi Asegura Konfiansa ASEAN Ba TL
Imagem : Presidente Repúblika José Manuel Ramos Horta iha Dili, 29/10/2025
SAP News TL, Díli : Hafoin partisipa simeira ASEAN nian ba dala 47°, Presidente Republika José Manuel Ramos Horta rekunhese Primeiru Ministru Kay Rala Xanana Gusmão ninia luta maka Timor-Leste adere ba ASEAN.
Marciana da Conceição – SAP News
Tuir lolos hein maun boot Xanana Gusmão to’o hodi hato’o boas vindas ba tanba nia maka “ita ohin sai membru ASEAN, nia maka dada ita husi tempu luta to’o independensia, manan fronteira marítima, halo projetu boboot, konstrusaun estadu no infraestrutura”.
“Prosesu diversifikasaun fundu petroliferu maka fo retornu bo’ot ba ita. Nia maka halo projetu eletrifikasaun, portu tibar. Tanba buat sira ne’e mak fo kondisaun ba ita atu tama ASEAN”. Hateten Presidente Republika José Ramos iha Salaun VIP Aeroporto Internacional Nicolau Lobato Comoro, 29/10/2025
Ramos hatutan, “Ne’e duni buat hotu-hotu ha’u rekoñese ba maun boot Xanana. Maibe hahu kedas iha loron 26 ita selebra, loron 27 servisu todan liu tan, ne’e tomak iha Primeiru Ministru nia kabaas no ministru sira nia kabas para ita kumpri programa dezenvolvimentu, hametin dame, para konfiansa ne’ebe lider sira iha ASEAN fo ba ita, ita la falla ka sala”.
Wainhira Presidente Republika José Manuel Ramos Horta to’o aeroportu internasional Nicolau Lobato simu direta hosi Primeiru Ministru Interinu Mariano Assanami Sabino hamutuk ho membru governu sira.
Tuir mai, Presidente Republika mós halo konferensia imprensa hodi esklarese ba povu kona ba admisaun Timor-Leste ba ASEAN no apresia entidade hotu ne’ebe kontribui ba prosesu adezaun ba ASEAN liliu Primeiru Ministru Kay Rala Xanana Gusmão.
Imagem : Populasaun sira simu Presidente Repúblika José Ramos Horta, hafoin partisipa adezaun Timor-Leste ba ASEAN iha Malásia.
Durante komboiu no akompanha Presidente Republika hosi aeroportu Comoro to’o Palácio Presidencial Nicolau Lobato, iha luron ninin labarik barak, estudante barak no populasaun sira ho laran ksolok hodi hakilar “viva Timor-Leste, Viva José Ramos Horta, Viva Timor-Leste”.
Populasaun sira ne’ebe hamrik iha dalan ninin, uza kamiza ” Together We Rise”, kaer bandeira ASEAN, bandeira Timor-Leste, Indonésia, Brunei, Laos, Malásia, Tailândia, Kambodia, Singapura, Filipina, Vietname no Myanmar hodi hakilar, haklalak no haksolok simu Presidente Republika José Manuel Ramos Horta.
Wainhira to’o iha Palácio Presidencial Nicolau Lobato, ekipa resepsaun simu ho hananu lia dadolin tuir kultura Timor-Leste nian.
Lembra fali katak, eventu importante ne’ebe Presidente Republika José Manuel Ramos Horta partisipa maka Asinatura hosi Deklarasaun kona-ba Admisaun Timor-Leste nian ba ASEAN iha loron 26 Outubru 2025 inklui enkontru importante sira selukseluk hosi loron 26-28 Outubro 2025.
Serimónia Asinatura hosi Instrumentu Adezaun ba Tratadu Amizade no Kooperasaun iha Sudeste Aziátiku (TAC) hosi Finlándia, Serimónia Asinatura hosi Protokolu Alterasaun Daruak hosi Komérsiu ASEAN nian Akordu (ATIGA), Simeira Líder sira Parseria Ekonómika Komprensivu Rejionál (RCEP) ba dala 5 no mós Serimónia Aprezentasaun Prémiu ASEAN.
Série enkontru nivel aas nian ne’e fornese oportunidade importante hodi halo balansu ba progresu ASEAN nian, estabelese diresaun sira iha futuru no reafirma kompromisu ASEAN nian ba pás rejionál, estabilidade, seguransa no dezenvolvimentu sustentável no inkluzivu.
Delegasaun ofisial hosi Timor-Leste mak hanesan Presidente Republika José Manuel Ramos Horta, Primeiru Ministru Kay Rala Xanana Gusmão, Vise Primeiru Ministru Francisco Kalbuadi Lay, Ministru Negosius Estranjeirus no Kooperasaun Bendito Freitas no Vise Ministra Asuntu ASEAN Milena Maria Da Costa Rangel, Ministru Transporte no Telecomunicações Miguel Manetelo, Sekretariu Estadu Komunikasaun Sosial Expedito Dias Ximenes, Vise Ministru Asuntu Parlamentares Adérito Hugo da Costa no Xefe Bankada CNRT, FRETILIN, PD, KHUNTO & PLP.