JHN Sei Fo Formasaun Ba Foinsa’e 400 Iha Ai-Laran

SAPNewsTL, Dili : Juventude Hadomi Natureza ( JHN) halo abertura ba aktividade akampamentu iha Resintu Sekretáriu Estadu Juventude no Desportu hodi fo formasaun ba membru estudante 400 ba eskola iha ai-laran, Munisípiu Baucau, Postu Administrativu Vemasse, Suku Caicua, Aldeia Caicua no foka liu ba formasaun karakter no edukasaun ambiental.

“Tinan-tinan Sekretáriu Estadu Juventude no Desportu sempre apoiu Juventude Hadomi Natureza hodi selebra loron  Falintil 20 de Agostu  nian hodi fo formasaun ba membru estudante  sira oinsa bele hatene hadomi natureza iha ita nia rai laran, Akampamentu ida ne’e atu lori membru estudante sira ba eskola iha ai-laran oinsa atu hatene kuidadu no hadomi natureza iha ita nia rai no oinsa hatudu nia karakter maneira sira ne’ebé imi  tuir ona  formasaun ida ne’e atu promove liu tan joven sira bele hadomi natureza”. Dehan Direktor Jeral SEJD David Tomas de Deus ba jornalista sira iha Resintu SEJD, Kinta-Feira, 18/08/2022.

Direktor ne’e akresenta sira mos iha ona material hodi fo formasaun ba treinadór sira iha Timor tomak oinsa halo relasaun ne’ebé saudavél ba joven sira.

“Ami mos agora iha ona material hodi fo formasaun kona-ba relasaun formasaun saudavél no  saúde reprudutiva, agora mos iha ona manual propriu ba ida ne’e hodi fo formasaun ba treinador sira no formasaun ne’e foin remata iha Baucau atu transforma joven sira oinsa halo relasaun ne’ebé ho saudavél ba joven feto no mane sira rai ida ne’e”. Tenik Direktor

Entertantu, Prezidente Ezekutivu Asosiasaun Juventude Hadomi Natureza Joana de Jesus Soares hateten  aktividade eskola ai-laran ne’e hanesan programa annual JHN nian ne’ebé sempre hala’o hodi fo formasaun ba joven no estudante sira.

“Asosiasaun JHN ne’e lidera husi joven sira no ita haree liu ba formasaun karakter ho edukasaun meiu ambiental ne’ebé ita haree liu ba iha eskola iha ai-laran no eskola iha ai-laran hanesan formasaun anual ida ne’ebé JHN sira realiza husi 2019 to’o agora” hatete nia

Nia realsa, akampamentu ne’e ho karakter lori joven no estudante sira ba eskola iha ailaran hanesan formasaun relasaun saudavel, meiu ambiente ,reflorestasaun, formasaun lideransa ai-laran no istoria rezisténsia atu aumenta espiritu nasionalismu joven sira nian

Prezidente Ezekutiva ne’e salienta formasaun ida ne’e bele forma sira atu oinsa bele iha étika hodi hadomi natureza.

“Formasaun meiu ambiente ne’e liga liu ba foinsa’e sira nia mentalidade, oinsa hadomi natureza no mantein nafatin formasaun saida mak sira tuir ona, ita bele promove liu tan formasun sira ne’e atu hatutan ba tan foinsa’e sira  seluk hodi bele hadomi natureza”. Nia realsa

Joana fundamenta, sira halo mos formasaun revolusaun karakter atu oinsa bele kuidadu no hadomi natureza.

“Formasaun revolusaun karakter iha ai-laran, ita bele promove ita nia karakter liu husi natureza bele kuidadu no hadomi natureza ne’e mak hanaran revolusaun karakter hanesan moris iha sidade ho ai-laran la hanesan, dezastre no risku sira ne’ebé mak sira hasoru iha ai-laran, forma joven ida ne’ebé mak hamriik independente, saudavél, forte no matenek ita rai ne’e”. Nia hakotu

Jornalista: Antonio Tilman & Julieta Lopes Moniz

Editor: Luis dos Santos