Xefe Suku La Tuir Sorumutu Konsultivu Munisipál, MAE Sei Hapara Implementasaun PNDS
Imajem : MAE Tomas do Rosário Cabral Iha Edifisiu MAE Kaikoli, Segunda-Feira, 24/11/2025.
SAPNewsTL, Díli : Ministru Administrasaun Estatál (MAE Sigla Portugués), Tomás do Rosário Cabral deklara, Xefi suku sira ne’ebe la partisipa iha Sorumutu Konsellu Konsultivu Munisipál, Governu sei hapara implementasaun Programa Nasional Dezenvolvimentu Suku (PNDS).
Guilhermino Ramos da Cruz – SAPNewsTL
Tuir MAE Tomás hateten, nia parte simu relatoriu balun husi Munisipiu katak, antes ne’e Munisipiu realiza Sorumutu Konsellu Konsultivu Munisipál, maibé xefi balun la marka prezensa hodi diskute foku ba programa dezenvolvimentu suku nian.
“Ha’u simu relatoriu kuadu Konsellu Konsultivu konvida Xefi suku sira ba tuir reuniaun, Xefi suku balun la ba maibé Xefi sira la hatene katak Konsellu mak deside projeitu ba suku sira, inklui Programa Nasional Dezenvolvimentu Suku (PNDS)”. Preokupasaun ne’e MAE Tomás do Rosário Cabral ba Jornalista sira hafoin remata distribuisaun motorizada ba Xefi sira, Iha Edifisiu MAE Kaikoli, Segunda-Feira, 24/11/2025.
Nia esplika, assembleia munisipiu seidauk iha, Konsellu Konsultivu Munisipál mak representa, maibé iha reuniaun konsultivu Xefi suku balun laiha prezensa, signifika sira lakoi projeitu tama ba sira-nia suku.
“Kuandu iha Konsellu ne’e representa,
depois Xefi suku sira aprezenta relatoriu katak komunidade sira iha kraik hakilar hela ba bee, iha suku ema nain haat pessoal ida ba asuntu sosiais atu buka hatene komunidade vuneravel iha ne’ebe, maibe sira lakoi ba tuir reuniaun konsultivu, sè hanesan ne’e bebeik, ha’u sei hapara implementasaun programa iha sira-nia suku”.
Tomás Cabral hatutan, iha tinan 2026 nia parte sei tun direita ba suku sira hodi hasoru-malu ho Xefi Suku, Xefi Aldeia no estrutura suku sira atu ko’alia kona-ba programa dezenvolvimentu suku.
“Aproveita Xefi suku sira ohin mai ha’u fó atensaun ba sira, ha’u sei orienta tun ba kraik tanba tinan oin iha fulan Fevereiru iha semana datoluk hakat ba primeira semana fulan Marsu nian, sei iha sorumutu integradu iha suku no aldeia sira atu ko’alia kona-ba pre-programa implementasaun dezenvolvimentu suku, maibé Xefi suku sira la marka prezensa sai difikuldade bo’ot tanba sira la hatene programa sira ne’e”, Nia hakotu.