Fasilita Servisu Iha Rural, MAE Distribui Motor 20 Ba Suku 10
Imajem : Motorizada 20 ne’ebe governu atribui ba Xefe Suku na’in 10 & Sekretariu Suku na’in 10
SAP News TL, Díli : Governu liu husi Ministeriu Administrasaun Estatál (MAE Sigla Portugués) entrega motorizada 20 ba Xefi Suku nain 10 ho delegadu nain 10 ne’ebe mai husi Munisipiu Ermera, Baucau, no Munisipiu Manufahi.
𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 – 𝐒𝐀𝐏𝐍𝐞𝐰𝐬𝐓𝐋
Iha intervista Ministru Administrasaun Estatál (MAE) Tomás do Rosário Cabral hateten, XI Governu konstituisional kontinua implementa programa distribuisaun motorizada ba xefi suku sira, maibé lideransa suku sira tenki utiliza ho responsabilidade.
“Ohin, ha’u ko’alia ona ba sira atu uza motorizada ho kuidadu tanba motor rua ida ba Xefi suku, ida motor operasional ba sekretáriu suku sira” Dehan Ministru Administrasaun Estatál, Tomás do Rosário Cabral ba Jornalista sira iha edifisiu MAE, Kaikoli, Segunda-Feira, (24/11/2025)
Governante ne’e afirma, motorizada hirak ne’e atu hafasil lideransa suku sira hodi hala’o servisu kobre ba aldeia sira ne’ebe dok husi suku liu-liu liga ba asuntu sosiais sira.
“Iha suku ha’u husu atu jeneraliza tiha dadus online, tanba ne’e mak uza motorizada sira atu ajuda servisu sosiais sira ne’ebe lokaliza iha suku nia laran”.
Ministru Tomás fundamenta, tuir planu Governu kontinua esforsu hodi kompra motorizada sira atu distribui ba Xefi no Sekretáriu suku hirak ne’ebe seidauk hetan motorizada operasional.
Iha fatin hanesan, Xefi Suku Ueru-Mata Postu Administrativu Laga, Munisipiu Baucau, Sabino Martins, hato’o agradesimentu wain ba nonu governu konstituisional tanba bele fasilita motorizada ba lideransa suku sira.
“Motorizada ne’ebe ohin ami simu, ami agradese tebe-tebes ba governu liu-liu ba Ministru Administrasaun Estatál ho nia ekipa tomak, tanba bele distribui motorizada mai ami hanesan Xefi hodi fasilita ami-nia servisu”.
Autoridade Suku Ueru-Mata hatutan, nia parte kompromete utiliza motorizada hirak ne’e hodi hala’o servisu suku nian no halo kontrolu ba aldeia sira ne’ebe dok husi suku Ueru-Mata Postu Laga.
Tuir dadus suku sira ne’ebe sai benefisiariu mak hanesan, Munisipiu Ermera kompostu husi Suku Koliate-Leten, Suku Assui-Lau, Suku Poetete Villa, Suku Poetete Lodudu, Munisipiu Baucau hanesan Suku BuiLai, Caibada Makasae no Ueru-Mata, Munisipiu Viqueque Suku Macadique, Uaitame no Macadique de Cima, no husi Munisípiu Manufahi Suku Tahu -Bein.
Motorizada hirak ne’e Ministru Administrasaun Estatál distribui ba Suku hat (4) husi Munisipiu Ermera, Suku tolu (3) husi Munisipiu Baucau, Suku rua husi Munisipiu Viqueque no Suku ida Munisipiu Manufahi.